Ich Ebran von Ernstprunne vnd mein Hovsvrowe vro^e Margaret veriehen an disem brief allen den Laeuten, di in sehent, lesent oder horent lesen, di nv lebent oder hernah chumftich sint, daz wir mit gesamter hant vnd mit gv^oetem willen aller vnser erben, vnd mit zeitigen rat aller vnserr vreunt, ze der zeit, do wir iz wol getven mohten, an alle wider red vnd ierrsal aller laeut, swer si sint, oder swie si genant sint, verchoufft haben in dem aigen daz dem Tomaizleins vier lehen vnd allez daz daz dar zve gehort ze vaelde, ze holtze, vnd ze dorfe mit allem dem nvtz vnd reht vnd wier iz herbraht haben vnd swaz wier da gehabt haben, iz sei gestifte oder vngestifte, versuecht oder vnversuecht, daz hab wir allez gegeben den Erbern vnd den gaistleichen herren, dem Abt Johan vnd der samnunge datz dem Hailigen Chraeutz vmb anderthalb hundert phunt wienner pheninge, vnd vmb fvmf phunt der selben Munze meiner der vorgenanten Housvrowen ze leitchouffe, vnd sein ouch des gv^oete reht vnd vollichleich gewert. Der selben vier lehen ist ainez vnser reht aigen gewesen; so sint dev andern drev vnser reht lehen gewesen von meinem Herren hern Wernhart von Schowenberch. Die selben lehenschaft han ich in ouz braht vnd gevreiet von meinem vorgenanten Herren von Schowenberch, also daz er in vnd dem vorgenanten Chloster die egenanten lehenschaft der dreier lehen mit sein saelbes hantt ouf gegeben hat, vnd in sei verschriben hat mit seinen briefen, vnd mit seinem insigel vnd gegeben in daz oft genante gv^oet hat vvr^v rehtez vnd vvr^v veriez aigen ewichleich vnd vreileich ze besitzen, ze versetzen, ze verchouffen vnd allen iern frumen da mit ze schaffen. Vnd setz ich mich vber disen chouf ze rechtem scherm vvr^v alle ansprach fvr mich vnd fvr alle mein vreunt vnd ouzgenomenleich vvr^v meiner swester chind Hainreichen, Offen vnd Agnesen vnd Margareten vnd fvr alle mein mage vnd vreunt; vnd allez daz gv^oet, daz ich in dem Lande han, daz setze ich ze rechtem scherm dem vorgenanten Abt vnd der Samnunge des chlosters ze dem Hailigen Chraeutz, als des landes reht ist hie ze O^esterreich; vnd vergich an diesem briefe, daz ich Ebran vnd mein egenantev housvrowe, vnd mein erben, vnd mein vreunt, swer si sint, oder swa si sint, oder swie si genant sint, an allem dem dorfe ze dem Tomaizleins vnd an alle dev, daz dar zv^oe geho^ert, swi daz gehaizzen ist, ze holtze, ze vaelde, ze dorfe, iz sei gestift oder vngestift, versv^eecht oder vnversv^eecht, aller reht ainez fv^erbaz niht haben, weder abzelo^esen, oder ouz ze wechseln, oder ihtes niht da mit ze schaffen haben mit den vorgenanten herren von dem hailigen Chraeutz; wand wir von in emals dar vmb enphangen haben fivmfzich phunt phenning wienner Mvnze vnd daz vnd sic verschriben in daz ouch emaln mit vnsern briefen‚ vnd bestaetigten in iz mit vnserm insigel. Daz diser gewerft vnd diser chouf vnd unser vvr^vziht staet beleib vnd vnverwandelt‚ dar vber geb wir den oftgenanten heren vnd dem chloster disen prief versigelten mit vnserm insigel vnd mit vrchunde diser gezeuge, der namen an disem prief benant sint. Daz ist mein herre her Wernhart von Schowenberch, Her Chalhoh von Eberstorf der Chamrer in O^esterreich, Her Hadmar von Svnneberch, Her Chraft sein svn, Her Otto der Tvers, Her Greiffe ouf der Stetten, Her Chuenrat der Hv^oebmaister, Her V^olreich pei den prv^oedern vnd her Greiffe hern Greiffen svn Vnd her Chv^oenrat des Hv^oebmaisters svn vnd anderr frvmer laeut genv^oech. Diser prief ist gegeben ze wienn, dv nah Christes gebverd ergangen waren Tousent Iar, Drev hundert Iar. vnd dar nah in dem ainleften Iar, an Sand Angusteins tach.

Source Fulltext: WEIS, Heiligenkreuz (=FRA II/16, 1859) S. 33-35