Ich Chv^onrad amman ze Haselach vnd ich Alhait sein Housvrowe wir veriehen vnd tun chunt allen den, di disen brief ansehent oder heorent lesen, di nu lebent vnd hernach chumftich sint, daz mit veraintem willen wir baidiv vnd mit gesampter hant mit vnser Erben willen, ze der zit, do wir ez wol getun mohten, den Hof ze Haselach, des ein halbes leben ist, mit allen dem, daz darzv geheort ze dorffe vnd ze velde besueht vnd vnbesueht, der vnser reht Purchreht ist gewesen von dem Chloster ze dem Heiligen Chrevtz, daz selb vnser purchrecht gegeben haben dem vorgenanten Chloster vnd den Geistlichen Herren, dem Abt vnd der Samnunge ze dem Heiligen Chreutz mit allen dem reht vnd wir daran gehabt haben ledichlich vnd vreilich durch Gotes lob vnd durch hail vnser vnd vnserr vordern sel, vnd also, daz der vorgenant hof von in vnser baider vnd vnser ains, ob ains daz ander vberlebt, vnser leipgedinge sol sein ze vnser baider tagen in allen dem re^eht vnd wir in ê gehabt vnd verdient haben. Vnd swanne wir baidiv niht ensein, so sol der vorgenant hof mit allen dem, daz darzv^o geheoret oder chumftichlich darzv chomen mohte, mit arbait oder mit chouffe vnd swie der Hof mit reht von vns gebezzert wvrde, das vorgenant Gotshous nach vnserem tode an geuallen ledichlich vnd vreilich dem vorgenanten Chloster vnd den Herren ze dem Heiligen Chreutz allen ir frum da mit ze schaffen, als mit anderm ir vreyem aigen guet. Daz dise vnser gab von vns stet vnd vnuerchert beleib, durch gehugenusse vnd ewige bestetigunge diser sache, wan wir nicht aigen Insigel han, so geben wir dem oft yorgenanten Chleoster dem abt vnd der Samnunge ze dem Heiligen Chreutz disen brief ze vrchunde mit bestetigt des Erbern herren herrn Eberharts von walsse Insigel. Der Brief ist gegeben an sand Margareten tag nach Gots geburt vber Drevzehn hundert iar, darnach in dem ainleften Iar.

Source Fulltext: WEIS, Heiligenkreuz (=FRA II/16, 1859) S. 32-33