Fridericus dei gracia Dux Ausrie et Styrie Dominus Carniole, Marchie ab Portusnaonis Vniuersis christi fidelibus presentibus et futuris presens scriptum intuentibus Inperpetuum. Ad vtriusque vite felicitatem nobis prodesse nequaquam ambigimus, si loca diuino cultui deputata curaverimus ampliare et eorum commodo pia intendimus voluntate, beneficia dei et dona, que dei ecclesiis et locis religiosis pia prouisione principum Iargiuntur, representari coram deo cottidie et perpetuari credimus preces et precamina Religiosorum fratrum . . Monasterii Sancte Crucis pro eterna quiete Animarum felicis memorie Dominorum Alberti Romanorum et Rudolfi quondam Bohemie Regum, aliorumque progenitorum nostrorum, ad incrementum etiam salutis et prosperitatis nostre, nec non matris, fratrum et successorum nostrorum Austrie et Styrie principum lllustrium digne duximus admittenda. Et quia inter ceteras terrarum nostrarum ecclesias et pia loca ad monasterium Sancte Crucis Cysterciensis ordinis Patauiensis Dyocesis reuerentie et deuocionis Zelum gerimus specialem, tamquam locum a nostris predecessoribus prima fundatione dotatum, Vbi etiam preclari quondam Duces Austrie nostri Antecessares elegerunt ecclesiasticam sepulturam, Volentes eundem locum et Monasterium Sancte Crucis nostre donationis et fauoris gracia ampliare, pro remedio animarum dictorum Regum, nostrorumque remissione peccaminum de fratrum nostrorum omnium expresso consensu et Vnanimi voluntate Jus patronatus ecclesie in Aleht dicto Monasterio Sancte Crucis . . Abbati et fratribus ibidem Deo famulantibus, qui pro tempore fuerint, Jure perpetuo liberaliter tradimus et donamus pure et simpliciter propter Deum vt eorundem .. Regum .. nostri, matris nostre, nostreque parentele, aliorumque successorum nostrorum Austrie et Styrie principum singulis annis in crastino apostolorum Philippi et Jacobi intrante Maio cum vigiliis, missis, prandio et refectione fratrum, prout aliis principibus ibidem fieri est consuetum, Dies anniuersarius sollempniter celebretur. Testes huius rei sunt hii. Minhardus Comes de Ortemburg‚ Cunradus de Pottendorf, Henricus de Stubenberg, Ditricus de Pilichdorf marscalcus Curie nostre, Rudolfus de Scharfenberg, Wichardus de Topel, Herwordus de Symaning et magister Heinricus plebanus in La notarius noster, et alii fide digni. In cuius rei testimonium nostrum Sigillum presentibus duximus appendendum. Datum in Noua Ciuitate Anno domini Millesimo Trecentesimo Vndecimo. XVIII. Kalendas Januarii.

Source Fulltext: WEIS, Heiligenkreuz (=FRA II/16, 1859) S. 35-36