Capitulum Jaurinensis ecclesie vniuersis christi fidelibus presentes litteras inspecturis salutem in domino sempiternam. Ad vniuersorum noticiam harum serie uolumus peruenire, quod Stephanus filius Pauli de generacione Rapolth comitatus Musuniensis pro se et pro domina Elysabeth, consorte Nykkyl filii Pauli, ab una parte, Gregorius plebanus de Saprunio sotius et caucanonicus noster similiter pro se et pro Johanne ac Endre fratribus suis, filiis videlicet Benedicti de eadem cognatione Rapolth, ex altera ad nostram presentiam accesserunt, et prefatus Stephanus portionem suam totam, quam habuit in possessione Pechlend vocata cum omnibus utilitatibus et pertinenciis portionis eiusdem nullam particulam sibi in eadem reseruando simul cum quarta predicte domine Elysabeth sororis sue, quam ipsa domina iure naturali percipere debebat in eadem portione, dedit, vendidit et tradidit prefatis Gregorio plebano ac Johanni et Endree fratribus eiusdem, cognatis et proximis suis , pro viginti marcis denariorum per heredes heredumque eorum successores perpetuo, pacifice et quiete possidendam. Quamquidem pecuniam dictus Stephanus tam pro se, quam pro prefata domina sorore sua plenarie confessus est recepisse ab eisdem. Hoc assumpto et specialiter declarato, quod, si supra dicta domina Elysabeth soror sua ratione quarte sue, quam habuit in dicta portione, in posterum mouere questionem intenderet, sepedictus Stephanus eosdem Gregorium plebanum et fratres suos ac heredes eorum tenebitur expedire propriis laboribus et expensis, cum eidem domine sorori sue se pro quarta sua satisfecisse dixerit in pecunia prenotata. In cuius rei memoriam et perpetuam firmitatem presentes concessimus litteras nostro sigillo roboratas. Datum in octauis pentecostes anno domini M°. CCC° decimo primo. Magistris Ladizlao preposito, Andrea lectore et Stephano Custode ecclesie nostre existentibus.

Source Fulltext: WEIS, Heiligenkreuz (=FRA II/16, 1859) S. 31-32