Ich Hainreich genant von Chlaitzing vnd ich Hedbeich sein swester verihen an diesem prief vnd tuen chunt allen leuten, di in sehent lesen oder ho^erent lesen, di nu lebent oder hernach chunftich sint, daz wier mit guetleichem willen vnd wol verdachtem muet, ze den Zeiten, dv wier dehainen erben nich hetten vnd iz wol getuen mochten, ledichleichen vnd vreileichen an allen iersail aller levt, swer si sint oder swie sie genant sint, verchauffet haben vnsers rehten aigens sehes Schilling geltes wienner phening auf einem halben lechen datz peistorf dem abt vnd der Samnunge des chlosters datz dem hailigen chreutz ze besitzen, ze versetzen oder ze verchauffen, vnd allen ieren frumen damit ze schaffen vm ainlef phunt phening wienner munizze, vnd daz ovch wier des selben guettes schon vnd erleich gebert sein. Vnd di selben gvlt schol man dienen ze sand Michellmisse nach puerchrechtes gebonhait. Wir setzen vns ouch dem vor genanten Conuent vnd dem chloster vber disen chouf ze rechtem scherm, ich vnd mein swester dev vorgenant vnd weigant der vorsprech von neunbu^eerch, vnd sein zwen svn Chuenrat vnd hainreich für alle ansprach; vnd swa in dar an abge, so schullen si haben ovf vnserm hof zu pusemperge, der da haiszzet des Heinreiches hof von chlaiczzing. Wnd daz diser geberft vnd disev red stet buleib vnd vnverbandelt, dar vber geb wir disen prief ze mein sichtigen vrchunde diser sache den auf genanten herren vnd dem chloster versigelt mit dem insigel hern Marichartes von mistelbach vnd mit dem Insigel der erbern purger vnd der stat Marchttes halben von Neubu^eerch, wann wir, ich vnd mein swester, aigens insigel nicht heten vnd verschriben an disem prief di Namen ersamer leut, mit der wissen iz geschehen ist. Daz ist her Fridreich der Fitzlinger vnd Ot sein svn vnd Velreich der siben hiertter vnd hainreich der sibenhierter vnd her chvenrat von muchkraw der richter ze nevnbuerch, vnd Marchart der nachrichter vnd rapot der toscho, vnd Marichart der paghart. Daz ist geschehen, do nach Christes gepuerd ergangen waren tausent iar vnd drevhvndert iar vnd dar nach in dem szweliften iar.

Source Fulltext: WEIS, Heiligenkreuz (=FRA II/16, 1859) S. 38-39