Ich Weichard van Arenstain vnd ich Agnes sein housvrowe verihen vnd tun chund allen den, die disen prief lesent oder horent lesen, di nv lebent vnd hernah chunftig werdent, Daz wir gelten schullen dem hous vnd der Samnunge ze dem heiligen chreutz zehen phunt wienner phenninge Vnd vmb diselben phenning schullen die herren von dem heiligen chreutz choufen ain phunt phenning gu^elt, Vnd sol man daz dinen zv der Pitanz vnd sol die Samnung da van getrost werden, Vnd schullen auh dar vmb di selben herren gedenchen vnd pitten vmbe Rapotes sel mines geswein, dem got genade. Vnd dar vber ze einem offen vrchunde diser gult gewen wir ich vorgenanter Weichard van Arenstain vnd ich Agnes sein housvrowe der vorgenanten Samnung ze dem heiligen Chreutz disen prief versigelten mit vnserm ynsigel. Diser prief ist gegeben nah Christes gepurde vber tausent iar drevhundert iar darnah in dem Neuntzehenden iar, an vnser vrowen tage ze der Lichtmisse.

Source Fulltext: WEIS, Heiligenkreuz (=FRA II/16, 1859) S. 59