Ich Chunigunt die Cho^erpnerin ze Prespurch vergich vnd tu^en chvnt allen den, di disen brief lesent oder ho^erent lesen, di nv lebent oder nah chvmftich sint, daz ich mit verdachtem mu^et vnd mit gu^etem willen, vnd ze der zeit, da ich ez wol getu^en macht, dem erwern Herren Abt Otten vnd der sampnunge grabes Ordens des Havs ze dem Heiligem Chrevtz in Osterreich, da ich besunder gnad vnd andacht zu^e han durch got vnd durch meiner hail (sic) vnd meins wirtes, hern Ru^edolfes dem got genad, vnd aller meiner vordern sel, ainen weingarten, meins rechten aigens vnd meiner rechten arbeit, der gelegen ist ze Prespurch bei einem weingarten, der gehaizzen ist der Chetzeber, geschaft vnd gegeben han ledichleichen ze haben an alle ansprach nah meinem to^ed; vnd doch mit so avzgenomner red, daz man bege ierleich mein iartach nah meinem tod vnd meins wirtes vnd aller meiner vordern, mit vigilien, mit messen vnd mit gebet, nah ir orden gewonhait; vnd auch von dem weingarten an meinem iartag geben ein dienst, davon di herren getro^est werden, darnah vnd der weingart vber daz gepauw getragen mach. Vnd daz dise red vnd ditz gescheft stet vnd vnzeprochen beleib, so gib ich vorgenantev Chvnigunt dev Cho^erpnerin dem vorgenantem herren, Abt Offen vnd der sampnunge ze dem Heiligen Chrevtz disen brief, Wan ich selben nicht aigens insigels han‚ verinsigelten mit des ersamen herren insigel des Hambotes vnd mit der stat vnd der burger insigel. Diser brief ist gegeben nah Christes gepurt vber Tausent iar drevhundert iar‚ danah in dem Nevntzehentem Iar, an des heiligen chrevtzev tag, in dem Herbst.

Source Fulltext: WEIS, Heiligenkreuz (=FRA II/16, 1859) S. 61-62