Ich Hertneid vnd Ruedolf von Sachsengang veriehen an disem prief offenleich allen den, di in lesent oder lesen horent, di nu sint oder noch chumftich werdent, daz wir mit verdachtem muet vnd mit gueter frevnt rat vnd mit vnser erben gunst, ze der zeit, vnd wir ez wol getuen mochten, gegeben haben ledichleichen mit allem dem rechten, vnd wir her pracht haben vnd gehabt haben, der Samnung datz dem Heyligen Chrevtz die aigenschaft ze Perichtoltzdorf auf einem Hof, der fumf vnd sybentzich phenning dient, den si von den Weiderveldern mit anderm guet gechovffet haben. Vnd daz der vorgenanten Samnung an der vor genanten aigenschaft fuerwas nieman chainen chrieg tue oder getuen mug, dar vber geben wir disen prief versigelten mit vnsern paiden hangunden insigel. Daz ist geschehen, do von christes gepurd ergangen waren Drevtzehenhundert Iar dar nach in dem drev vnd zwaintzigisten Iar, an aller Hayligen tag.

Source Fulltext: WEIS, Heiligenkreuz (=FRA II/16, 1859) S. 91-92