Karolus dei gracia Hungarie, Dalmacie, Croacie, Rame, Seruie, Lodomerie, Comanie, Bulgarieque Rex, Princeps Salernitanus et Honoris ac montis sancti angeli dominus Omnibus christi fidelibus tam presentibus quam futuris presentes litteras intuentibus salutem in omnium saluatore. Justis petencium desideriis consensum prebere ius inuitat et Regalis sublimitas exortatur. Proinde ad vniversorum noticiam harum serie volumus peruenire quod vir religiosus frater Otto abbas monasterii sancte crucis ordinis Cysterciensis de austria, Patauiensis Diocesis, fidelis noster ad nostre serenitatis accedens presenciam exhibuit nobis priuilegium nostrum priori et antiquo sigillo nostro consignatum super donacione cuiusdam possessionis Castri nostri Musuniensis Zcechun vocate per nos concessum et confectum et peciit a nobis cum instancia, vt ipsum priuilegium ratum habere et ad maiorem ipsius donacionis nostre certitudinem apposicione noui et autentici sigilli nostri dignaremur confirmare. Cuius quidem priuilegii nostri tenor talis est. (Folgt die S. 53, Nr. LIX abgedruckte Urkunde, ddo. 16. September 1318.) Nos itaque iustis et legitimis petitionibus eiusdem fratris Ottonis diligenter auditis, reuocatisque in memoriam dampnis et iniuriis per nos et exercitum nostrum predictum eidem ecclesie Sancte Crucis illatis, ut premittitur, prefatum priuilegium nostrum rite et legitime ac ex nostra scientia datum et concessum presentibus de uerbo ad uerbum inseri facientes ratificamus, acceptamus, approbamus et appositione noui et autentici sigilli nostri confirmamus, dupplicis sigilli nostri munimine roborando. Datum per manus discreti viri magistri Andree, Lectoris Quinque ecclesiensis et aule nostre vicecancellarii dilecti ac fidelis nostri. Anno domini M°. CCC°. xx°. tercio. Regni autem nostri anno similiter xx^mo tercio, Quarto nonas Decembris, Venerabilibus in Christo patribus dominis Bolezlao Strigoniensi eiusdemque loci Comite perpetuo et fratre Ladizlao Colocensi archiepiscopis, Johanne Nitriensi, Benedicto Chanadiensi, Georgio de Syrmia, Nicolao Jaurinensi, Jwanka waradiensi, fratre Petro Boznensi, Ladizlao Quinque ecclesiensi, Andrea Transiluano et Herrico vesprimensi ac Chanadino Agriensi ecclesiarum Episcopis, Magnificis viris Philipo Palatino Comite de Scepusio et de Vyuar, Demetrio magistro tauernicorum nostrorum et Comite Bachiensi, magistro Lamperto iudice Curie nostre et Comite Chanadiensi, Thoma vaiuada Transyluano et Comite de Zolnuk, Nicolao bano totius Slauonie et Comite Suprvniensi, Paulo bano de Macho Comite de Budrug et de Volkov, Micck magistro tauernicorum Domine Regine consortis mee Karissime et Comite de Saruar, Deseu iudice Curie eiusdem domine Regine, Blasio magistro agasonum nostrorum, Dyonisio magistro dapiferorum nostrorum et Castellano de Mihald, et magistro Nicolao Comite Posoniensi, ac aliis quam pluribus Regni nostri Comitatus tenentibus et honores.

Source Fulltext: WEIS, Heiligenkreuz (=FRA II/16, 1859) S. 92-94