Ich Rapot von Wildek vnd ich Margret seine Housfrowe vnd ich Hertneid vnd ich Otte, ich Chadolt vnd ich Alber Hern Otten sune van Wildek, wir veriehen vnd tun chund allen den, die disen prief lesent oder horent lesen, di nu lebent vnd hernach chumftig werdent, Daz wir dem ersamen Hern Hern Otten apt ze dem heiligen Chreutz vnd auh der Samnunge gemain des selben chlosters haben verchouft mit vnser erben gutem Willen vnd auh gunste aller vnsrer vreunt ze den zeiten, do wir ez wol getv^on mochte, vnsers rechten aigens anderthalb Lehen, di gelegen sint in Wildratz, vm fivmf vnd dreizig phunt wienner phenning, der wir reht vnd gentzleich gewert sein. Vnd dar vber durch pezzer sicherhaid so setzen wir vns ze rehtem scherm den vorgenanten Herren vber das vorgenant gůt, daz wir ze chouffen habn gigeben, für alle ansprach, als des Landes reht ist vnd geben in darvber disen prief ze einem ewigem vrchund, versigelten mit vnsern fivmf ynsigel. Diser prief ist gigeben nah Christes gepurde vber drevtzehenhundert iar, darnah in dem vier vnd zwaintzigistem iar, an sand Gregorii tag in der vasten.

Source Fulltext: WEIS, Heiligenkreuz (=FRA II/16, 1859) S. 99