Ich Alhait hern Otten von Wildek witib, Ich Hertneid, ich Otto, ich Chaloch vnd ich Alber, ir paider svn veriehen vnd ton chvnt allen den, die disen prief lesent oder ho^erent lesen, die no lebent vnd her nah chvnftig sint, daz unser hold ze den zeiten Perchtolt Leutoltz svn von Maustrenk, der vns sechs Schilling wienner phening dienet zwir in dem Iar, daz ist an sant Michels tag vnd an sant Gergen tag von einem halben Lehen, wider vns ab gelost hat sechzich phening geltes vmb zwelif phvnt wienner phening, der wir gar vnd gentzlich gewert sein vnd daz vbrig halbphvnt geltez wiener phening hab wir gegeben williclich vnd gern ze den zeiten, do vns nieman dar an geirren mocht, vnd ouch mit vnser nahsten vnd besten frevnt rat hitz dem heiligen Chreutz ze einem Selgeret durch vnsers liben vaters willen, daz man sein dester fleizichlicher gedenkh da selber in allem irm gu^ettet, als sie gewohnhait habent, vnd ouch svnderlich dar vmbe, daz si in mit ir selbes guet da selbe bestattet habent. Vnd dar vmbe geb wir in disen prief ze einen sichtigen vnd waren vrchund versigelt mit vnserm Insigel. Dieser prief ist gegeben ze Wiene, da man zalt von Christes gepurt Dreutzechen hvndert Iar dar nah in dem vier vnd zwainzichistem Iar, an dem nahsten Svntag vor plvemostern tag.

Source Fulltext: WEIS, Heiligenkreuz (=FRA II/16, 1859) S. 100-101