Ich Hainrich vom Ror vnd ich Geisel sin housvrowe wir veriehen vnd tun chunt allen den, di disen prief sehent oder horent lesen, di nv lebent vnd hernach chunftich sint, daz wir mit verdahtem mu^et vnd mit gesamter hant, mit willen vnd gunst aller vnser erben zv der zeit, do wir iz wol getun mochten, habn verchoufft vnsers rechten aigens ein phunt geltes, daz do leit ze Paden bei der Olochgazzen, gestiftet mit vier holden, den erwaern herren hern Weicharten von Arnstain mit allem dem nuzze vnd mit allem dem reht ze veld vnd ze dorf, als wir iz her bracht haben in rechter aigens gewer nah des landes reht ze Osterreich, vmb zwelif phunt phenninge wienner munze, der wir recht vnd redlich gewert sint. Daz vorgenant phunt gelts daz gib ich Weichart von Arnstain dem erwaern herren apt Otten vnd siner Samnunge gemain dvrch mines vettern sel willen, hern Chvnrats von Arnstain vnd durch aller vnser voder sel willen also, daz die vorgenant samnunge von dem heiligen Chrevtze vnser schullen gedenchen vncz an den iungisten tach; svllen ouch si mit der vorgenanten gvlt furbaz allen iren frvm schaffen, swi iz vueg der samnunge. Durch pezzer sicherhait so sezze wir vns vorgenanter hainrich vnd Geisel min hovsfrowe vnd vnser erben ze rechtem gwer vnd scherm fur alle ansprach nah des Landes reht ze Osterreich. Daz lob wir in ze laisten mit vnsern triwen, daz svllen si avf vns haben vnd avf allem vnsern gut, daz wir habn in dem Lande ze Osterreich, vnd geben in dar vber disen brief versigelten mit vnserm Insigel vnd mit vnsers herren Insigel, hern Vlriches von Pergowe vnd mit herrn Otten Insigel des Tvrsen, mit hern Weichartes Insigel von Arnstain vnd mit herrn Vlriches Insigel des Pergawers svn, di diser sache gezivg sint mit irn Insigeln. Diser brief ist geben ze dem heiligen Chrevtze, do nah Christes geburt waren ergangen Drevzehenhvndert iar, in dem vier vnd zwaintzigistem iar an sand Veits tach.

Source Fulltext: WEIS, Heiligenkreuz (=FRA II/16, 1859) S. 105-106