Ich Vlreich von Toppel vnd ich Margret sein Hausfrowe vnd ich Weichart von Toppel sein brůder vnd ich Elzbet sein hausfrowe, wir veriehen vnd tůn chunt allen den, die disen prief lesent oder horent lesen, die nu lebent vnd hernach cnunftich sind, daz wir mit vnser erben guten willen vnd gunst, mit verdachtem můt vnd mit gesampter hant zv der zeit, do wir iz wol getůn mochten, Verchauft haben vnsers rechten aigens fu^enf phunt wienner phenninge geltes, die da ligent ze Praitense ze naehst oberhalb dez Dorfes in dem Mitrnperge auf zehen Jeuch weingarten, mit allem dem nutz vnd recht, alz wir si in aigens gewer her pracht haben, vmb zwů vnd zwaintzich march silbers, ie zwen vnd sibentzich grozzer phemischer phenninge fur ein ieglich march, dez wir recht vnd redleich gewert sein, dem erbern herren Brůder Otten zv den zeiten Apt datz dem Heiligen Chreutze vnd der Samnunge gemaine dez selben Chlosters vnd allen irn nachchomen furbaz ledichleich vnd vreileich ze haben vnd allen irn frumen damit ze schaffen, verchauffen, versetzen vnd geben, swern si wellen an allen irresal. Vnd dar vber zv ainer pezzern sicherhait so setzen wir vns, ich Vlreich von Toppel vnd ich Margret sein hausurowe vnd Ich Weichart von Toppel sein bruder vnd ich Elzbet sein hausurowe, vnd ich Stephan vnd ich Fridreich von Toppel, ir bru^eder vnuerschaidenleich mit sampt allen vnsern erben vber die vorgesprochen funf phunt geltes brůder Otten zv den zeiten apt datz dem heiligen Chreutze vnd der Samnunge gemaine dez selbens Chlosters vnd allen irn nachchomen zv rechtem gewer vnd scherm für alle ansprach, alz aigens recht ist vnd dez Landes recht ze Österreich. Vnd daz diser chauf furbaz also staet vnd vnuerwandelt beleibe, dar vmb so geben wir in disen prief zv ainem offen vrchunde vnd zu einem waren gezeuge diser sach versigelt mit vnsern Insigeln. Diser prief ist geben ze Wienne nach Christes gepu^ert Drevtzehen Hundert iar in den funf vnd zwaintzgisten iar dar nach, an sant Katreyn Tage.

Source Fulltext: WEIS, Heiligenkreuz (=FRA II/16, 1859) S. 108