Ich Nycla vnd ich Fridreich weilant Mathes sun von Sand Veit, wir veriehen offenlich vnd tun chunt allen den, di disen brief an sehent, ho^erent oder lesent, daz vnser lieber Vether, her Ortolf von Sant Veit mit vnserm gutem willen vnd gunst geben hat den erbarn Geistlichen heren Aptt Jacoben, zu den selben Zeiten Aptt daz dem heiligen Chraeutz in Osterreich vnd der sampnung da selbs sand Bernhartes orden, durch Got vnd durich vnserer vodern sel willen vnd ovch durch seiner sel hail zwelf march gelts friesaher phenning vnd etwiuil mer, vnd hat in in den selben zwelf march gelts geben mit vnserm gutem willen vnd gunst den perich zu Surwirch, der vnser gewesen ist, für ein phunt gelts, vnd hat er vns für daz selb phunt gelts geben ein ander phunt gelts vnd etwiuil mer auf dem gut in dem Staeul, da Jacob aufgesezzen ist, vnd haben vns des vorgenanten pergs geaeusent mit allen nutzen vnd rechten, di wir da von gehabt haben, also daz wir noch unser erben chein ansprach noch chein red fürbaz zu den vorgenanten perig gehaben mügen, noch sullen weder chlein noch grozz vnd habent och di vorgenanten heren von dem Heiligen Chraeutz vollen gewalt zu tun vnd ze schaffen allen iren frum mit dem vorgenanten perig, als mit anderm iren aigen gut. Daz daz also stet vnd vnzebrochen beleib, geben wir den vorgenanten heren von dem Heiligen Chraeutz mit vnser baider angehengtem Insigel disen brief versigelt vnd och mit der Erbar mannen, di hernach benennet sint, di iren Insigel daran gehenget habent. Her Johanns des Comes Vitztum in Chaernden, Jacob des Vreyberger von dem Grasenperig, Götze von Regenspurch. Der brief ist geben ze vrfusperch an sand veites tag, do von Christes gepurt ergangen warden Dreutzehen hundert Iar vnd darnach in dem zwai vnd Drizzigisten Iar.

Source Fulltext: WEIS, Heiligenkreuz (=FRA II/16, 1859) S. 154