Ich Philipp der Schench vnd ich Percht sein Hausfrowe, wir veriehen vnd tuen chunt allen den, die disen prief lesent oder horent lesen‚ die nv lebent vnd hernach chunftich sint‚ daz wir mit vnser erben guten willen vnd gunst, mit verdahten mute vnd mit gesampter hant, zu der zeit, do wir ez wol getun mochten‚ verchauft haben vnsers rechten aigens funf schilling wienner pfenninge geltes, di da ligent datz Gundramstorf auf behausten holden gestiftes gutes, mit alle dev, vnd dar zv gehort, ze velde vnd ze dorf, swie so das genant ist, vnd die weilnt hern Leupoldes des Fuezzes gewesent sint, dem got gnad. Die selben gulte haben wir verchauft vnd geben mit allem den nutz vnd recht, als si vnser vodern vnd wir in aigens gewer her pracht haben, vmb zehenthalb phunt wienner pfenning, der wir recht vnd redleich gewert sein, den erbern geistlichen leuten . . dem Apt vnd dem Conuent zem heiligen Chraeutz furbaz ledichlich vnd freilich ze haben vnd allen irn frumen da mit ze schaffen, verchauffen, versetzen vnd geben, swem si wellent an allen irresal, vnd sein ouch wir, ich Philipp der Schench, Vnd ich Percht sein Hausfrowe vnd vnser erben vnuerschaidenlich der vorgenanten gu^elt . . des Aptes vnd des Conuents rechter gewer vnd scherm fur alle ansprach, als aigens recht ist vnd des Landes recht ze Ostereich. Vnd das diser chauf furbaz also staet vnd vnuerwandelt beleibe, vnd wand wir selber nicht aigens Insigils haben, so geben wir in disen prief zu einem offen vrchunde vnd vestnung versigelt mit des erbern herren Insigil hern Haertneides von Sachsengang, vnd mit hern Wilhalms Insigil pei dem Prunne vnd mit hern Jacobs Insigil seins pruders, die wir des gepeten haben, das si diser sache gezeug sint mit irn Insigiln, vnd andre frume leute genuch, den der chauf wol chunt ist. Diser prief ist geben ze Wienne, nach Christes gepurt Dreutzehenhundert Iar in dem zwai vnd dreitzgisten Iar, dar nach an sant Vrbans tag.

Source Fulltext: WEIS, Heiligenkreuz (=FRA II/16, 1859) S. 153