Ich Marchart der Metsieder, purger ze Wienne vnd ich Agnes sein hausvrowe Wir verichen vnd tun chunt allen den, die diesen prief lesent oder horent lesen, di nv lebent vnd hernach chunftich sint, Daz wir mit vnser erben guten willen vnd gunst, mit verdachtem mvte vnd gesampter hant, zv der zeit, do wir iz wol getvn mochten, lauterlich dvrch Got vnd dvrch vnser vodern sel willen vnd auch durch vnser selber sel hail geben haben in das Pitantzampte zv dem Heiligenchreutze Vnsers rechten chaufaigens, des wir gechauft haben wider hern Philippen den Schenchen vnd wider sein hausvrowen vron Perchten vnd wider ir erben, fiunf schilling wienner phening geltes, die da ligent datz Gundramstorf auf behausten holden gestiftes gutes mit alle dev vnd dar zv gehort ze velde vnd ze dorf, swie so daz genant ist, Vnd mit allem dem nvtz vnd rechte, als wir si in aigens gewer her pracht haben; so beschaidenlich, swer Pitantzmaister datz dem Heiligenchrevtz ist, von der selben gulte alle iar geben sol dem chnecht, der da phligt der warmen lauge vnd des warmen wazzers vnd auch des Chalten wazzers, so die herren ir haupte twachen wellent, Drei Schilling phenning, Vnd dem Chnecht, der der warmen lavge alle tag taeglichen phligte den herren zv den Henten, Viertzich phenning, Vnd die zwaintzich phenning, da mit man daz Azzaech aller ieerlich pezzer, daz dar zv gehort an allen chrieg. Vnd swelchs iars des nicht geschaech, also daz iz abgienge, von swelcherlei sachen daz weer, so svln wir oder vnser erben oder vnser naechsten frevnt vns denne derselben gulte mit ir guten willen vnderwinden Vnd inne haben, so lange vntz daz iz alles wider tan wirt. Vnd dar vmb so geben wir in disen prief zv einem offen vrchvnde vnd vestnvnge versigilt mit vnserm Insigil. Diser prief ist geben ze wienne nach Christes gebvrt Dreutzehenhvndert iar, In dem zwai vnd Dreitzgisten iar darnach, An Sand Johanns tage ze Svniwenten.

Source Fulltext: WEIS, Heiligenkreuz (=FRA II/16, 1859) S. 155