Wir Rudwein von Gottes genaden Probst des Gotshaus vnser wrowen ze Newenburch Chlosterthalben, ich Dauit zu den zeiten Techent vnd der Conuent gemain des selben Gotshaus Vergehen vnd tun chunt allen, die disen brief lesent oder horent lesen, die nv lebent vnd hernach chunftich sint, Daz wir mit gutem willen, mit verdachtem můt vnd mit gemainem Rat vnsers Conuentes, zu der zeit, do wir es wol getůn mochten, ze einem Widerwaechssel gegeben haben vnsers rechten aigens Des ersten fu^emf phvnt vnd drev vnd Dreizzich phenninge wienner mu^enzze geltes vnd an zwelif Chaes fu^emf Schillinge Chaesgeltes, daz ieder Chaes ains wienner phennings wert sei, daz alles gelegen ist ze Phafstetten auf gestiftem gut behauster Holden, vnd Drew phunt wienner phenninge geltes auf denselben Holden fur Taydinge phenninge vnd fu^er Mal phenninge Vnd zway phvnt vnd drei Schillinge vnd fv^emftzehen phenninge wienner munzze geltes daselbens ze Pfafsteten auf vberlent. Dieselben gult haben wir recht vnd redleichen ze einem rechten widerwaechssel gegeben mit alle dem nvtz vnd recht, als wir si in aigens gewer herpracht haben, ze dem rechtem als vorgeschriben stet. Den erbern gaestleichen Herren dem Apt vnd dem Conuent gemain daz dem Heiligen Chreutz vnd allen irn nachchomen fürbaz ledichleichen vnd vreyleichen ze haben vnd allen irn frumen damit ze schaffen, verchauffen, versetzen vnd geben swem si wellen an allen irresal. Da engegen so haben si vns vnd vnserm Gotshaus auch ze einem widerwaechssel geben irs rechten aigens die gult, die hernach geschriben stet. Des ersten, achtzich metzen waitzs geltes vnd sechs Mutte vnd viertzehen metzen habern geltes vnd sechs phunt wienner phenninge geltes an Nevn phenninge daz alles gelegen ist ze Eberhartstorf auf gestiftem gu^et behauster Holden, vnd ainen Mutte Chorn vnd zwen Mutte habern geltes von einem zehent daselbens ze Eberhartstorf, vnd fumf phunt vnd sechtzich phenninge geltes wienner mvnzze, die da ligent ze Stetten auf bestiftem gut behauster holden, Damit fürbaz auch allen vnsern frvmen ze schaffen, als vns daz aller peste wol chvm vnd fu^ege an allen irre-sal. Vnd darvber zu einer pezzern sicherhait so setzen wir vns, Wir Propt Rudwein, Ich Dauit zu den Zeiten Techent vnd der Conuent gemain des vorgenanten Gotshaus vnser vrowen ze Newenburch Chlosterhalben vnd alle vnser nachchomen vnuerschaidenleich vber die vorgenanten gu^elt alle ze Pfafsteten den egenanten gaestleichen Herren gemain datz dem Heiligen Chreutz vnd allen irn nachchomen ze rechten gewern vnd Scherm für alle ansprach, als aigens recht ist vnd des Landes recht ze Österreich. Vnd daz diser widerwaechssel furbaz also staet vnd vnzerbrochen beleibe, Darv^eber so geben wir Propst Rudwein, Ich Dauit der Techent vnd der Conuent gemain des Gotshaus vnser vrowen ze Newenburch Chlosterhalben den gaestleichen Herren gemain datz dem Heiligen Chreutz vnd allen irn nachchomen diesen brief zu einem warn sichtigen vrchunde vnd zu einer ewigen vestnunge diser sache versigilt mit vnsern anhangunden Insigiln. Diser brief ist geben ze Newenburch Chlosterhalben nach Christes gepurd Drewtzehen Hundert iar, darnach in dem Siben vnd viertzgisten Iar, des naehsten Eritages vor sant Michels Tage.

Source Fulltext: WEIS, Heiligenkreuz (=FRA II/16, 1859) S. 202-203