Capitulum Jauriensis ecclesie omnibus christi fidelibus presentibus pariter et futuris presencium noticiam habituris salutem in domino sempiternam. Cum omnia, que ex bono mentis proposito bonaque deliberacione fiunt in tempore, ne tractu temporis per quempiam possint uel ualeant inmutari, ad perpetuam rei memoriam scriptis autenticis perempniter permansuris consueuerunt communiri. Proinde ad noticiam uniuersorum harum serie uolumus peruenire, quod Endre de Eayka vna cum Benedicto filio suo ac domina Elysbeth consorte sua, nec non Katherina filia sua parte ex una, Item Aygil procurator ecclesie sancte Crucis ordinis Cysterciensis prope Ferteu existens in persona honorabilis et religiosi viri domini Leopoldy abbatis eiusdem ecclesie sancte Crucis parte ex altera, coram nobis personaliter constituti per eosdem Endre, Benedictum, Elyzabeth et Katherinam propositum extitit et relatum ministerio viue uocis in hunc modum, quod quandam possessionem Pechlen vocatam in Comitatu Mosoniensi prope lacum fertew habitam titulo empcionis mediantibus aliis Litteris nostris priuilegialibus exinde confectis vigore earumdem litterarum priuilegialium cum vniuersis vtilitatibus et pertinenciis eiusdem, quibus ipsi actenus habuissent et possedissent, eidem domino Leopoldo et per eum predicte ecclesie sancte Crucis pro quinquaginta talentis denariorum latorum Vyennesium plene persolutorum ab eodem et receptorum vendidissent et vendiderunt coram nobis Jure perpetuo et irrevocabiliter possidendam, tenendam et habendam, dictis autem aliis litteris nostris priuilegialibus factum ipsius empcionis exprimentibus in manus ipsius Aygil procuratoris assignando. Insuper obligauerunt se pretacti Endre et Benedictus, nec non domine Elyzabeth et Katherina vocate et suos heredes, memoratum dominum Leopoldum et per eum sepefatam ecclesiam sancte crucis ab omnibus temporum in processu racione sepe dicte possessionis inpetere volentibus defendere et expedire laboribus propriis et expensis. In cuius rei testimonium presentes fecimus litteras sigillo nostro autentico et pendenti consignatas priuilegiales permedium alphabeti intercisas emanari, presentibus tamen Briccio preposito, Mathia lectore, Petro custode, Georgeo cantore et aliis dominis multis in predicta ecclesia deo deuote famulantibus. Datum sabbato proximo ante quindenam Natiuitatis beati Johannis Baptiste anno domini Millesimo CCC°. quadragesimo septimo.

Source Fulltext: WEIS, Heiligenkreuz (=FRA II/16, 1859) S. 201-202