Guido miseratione diuina tituli sancte Cecilie Presbiter Cardinalis, apostolice sedis Legatus . . Venerabili in christo Patri . . Episcopo Patauiensi Salutem in domino. Digne peticiones illas ad graciam exauditionis admittimus, per quas ecclesiarum et monasteriorum utilitati consulitur et personarum necessitatibus subuenitur. Exhibita siquidem nobis dilectorum in christo ... Abbatis et conuentus monasterii Sancte Crucis, ordinis Cisterciensis vestre Patauiensis diocesis petitio continebat, quod fructus, redditus et prouentus monasterii ipsorum predicti sunt adeo tenues et exiles, quod ad sustentationem pauperum et aliorum christi fidelium ibidem concurrencium nullatenus sufficere dinoscuntur, quodque . . Abbas ipse ex eisdem secundum sui status condecenciam nequit comode sustentari et alia sibi incumbentia onera supportare. Quare nobis humiliter supplicarunt, ut eisdem in hac parte paterno compacientes affectu prouidere super hoc de oportuno remedio misericorditer dignaremur et parochialem ecclesiam Sancti Georgii de Oleth dicte uestre diocesis ad eorumdem . . Abbatis et Conuentus praesentationem spectantem, cum omnibus iuribus et pertinenciis suis eorumdem monasterio prelibato vnire et incorporare ac in perpetuum annectere de speciali gracia dignaremur, Nos itaque de predictis, ut conuenit, noticiam non habentes paternitati uestre, de qua in hiis et aliis fiduciam gerimus in domino specialem, auctoritate, qua fungimur, tenore presencium committimus et mandamus, quatinus de predictis diligenter inquirentes, si inueneritis, predicta ueritate fulciri et Vobis expediens uideatur, super quo uestram conscientiam oneramus, ecclesiam ipsam Sancti Georgii cum omnibus iuribus et pertinenciis suis eorum monasterio memorato vnire, et incorporare ac in perpetuum annectere procuretis Ita, quod cedente uel decedente rectore ecclesie Sancti Georgii, qui nunc est, uel ecclesia ipsa quocumque alio modo uacante liceat eis et successoribus suis, qui pro tempore fuerint, predictam Ecclesiam sancti Georgii cum iuribus et pertinenciis suis et corporalem possessionem eiusdem ingredi ac etiam libere aprehendere et tenere, ipsiusque fructus redditus et prouentus in proprios vsus conuertere, consensu alterius cuiuscumque minime requisito; Prouiso, quod predicta ecclesia Sancti Georgii debitis obsequiis non fraudetur, sed faciant ibidem prout oportunum extiterit et est alias fieri consuetum, deseruiri laudabiliter in diuinis. Datum apud Wiennam Patauiensis diocesis ij°. kalendas Julii Pontificatus domini Clementis pape VI. anno Octauo.

Source Fulltext: WEIS, Heiligenkreuz (=FRA II/16, 1859) S. 210-211