Uniuersis et singulis presentes litteras inspecturis Pontius miseracione diuina episcopus Vrbiuetanus ac in alma vrbe domini pape vicarius, Jacobus episcopus Nepessinus, Frater Stephanus episcopus Tassaranus, Nicolaus episcopus Ortanus et frater Johannes episcopus Balneoregiensis salutem in domino sempiternam. Quoniam, ut ait apostolus‚ omnes stabimus ante tribunal christi recepturi, prout in corpore gessimus siue bonum fuerit, siue malum, oportet nos diem messionis extreme misericordie operibus preuenire ac eternorum intuitu seminare in terris, quod reddemte domino cum multiplicato fructu recolligere valeamus in coelis, firmam spem fiduciamque tenentes, quod qui parce seminat, parce et metet, et qui seminat in benedictionibus, de benedictionibus et mettet vitam eternam. Cum igitur ex parte dilecti filii Fratris Aglini de proprio nouo magistri curie inobis fuerit humiliter supplicatum, ut omnibus venientibus ad ecclesiam Sancte Crucis in Austria diocesis Rabanensis (sic) velimus indulgentiam exibere, Nos uero de omnipotentis dei misericordia ac beatorum Petri et Pauli apostolorum eius auctoritate confisi omnibus vere poenitentibus et confessis, qui uel que praedictam visitauerint ecclesiam in ipsis festiuitatibus, seu etiam sollempnitatibus Beate Marie virginis, Natiuitatis domini, Circumcisionis, Epiphanie, Resurectionis, ascensionis, Pentecostis, trinitatis, dedicationis ecclesie Sancte Crucis, Sanctorum angelorum, Johannis Baptiste, beatorum Petri et Pauli et omnium apostolorum et Euangelistarum ac sanctorum martyrum Stephani et Laurentii, sanctorum doctorum Jeronimi et aliorum doctorum, Sanctorumque confessorum Nicolai et Martini, nec non Beatarum Marie Magdalene, Agnetis, Luciae, Catharine, Margarete, Cecilie, Elysabeth, et in festo omnium Sanctorum et per eorum octauas, in die animarum et singulis diebus dominicis ac etiam, quando corpus christi circumportatur infirmis, secuti fuerint, aut qui in serotina pulsatione campanae ter Ave Maria deuote dixerint, uel qui ad fabricam, luminaria, ornamenta et alia dicte ecclesie necessaria manus porrexerint adiutrices, quilibet nostrum quadraginta dies de iniunctis eis penitentiis misericorditer in domino relaxamus, dum modo ad ea diocesanus episcopus prestet assensum. In cuius rei testimonium presentes litteras nostrorum sigillorum fecimus appensione muniri. Data Rome in palatiis nostris Anno domini Millesimo CCCL. pontificatus domini Clementis pape sexti, Indictione tercia, mensis Decembris die III. Anno nono Pontificatus eiusdem domini pape Clementis.

Source Fulltext: WEIS, Heiligenkreuz (=FRA II/16, 1859) S. 211-212