Ich Hartel von Poherlitz, des langen Hainreichs Schreiber vnd ich Leubman der Huetstoch, Purger ze wienne, ze den zeiten vnsers Jvncherren Jacobs des Langen Hainreichs svn, dem got genad, verweser verichen vnd tven chvnt allen den, di disen brief lesent oder ho^erent lesen, di nv lebent vnd her nach chvmftich sint, Daz wir mit guetem willen vnd mit verdachtem mvet, vnd auch mit zeitigem rat des vorgenanten Jacobs nächst vreunt, ze der zeit, do wir ez wol getven mochten, Ein Halbs phvnt pfenning vnd zehen pfenning geltes wienner mv^enz rechtes aigen guetes, di gelegen sint ze Minchendorf auf v^oberlentigen guet, als hernach genant wirt, Der da dient Thoman der Swaemmel von einer wisen dreizich pfenning, Niclas der En dreisich pfenning, Wernhart von Dornpach dreizich pfenning, Vlreich der Amman von einem acher sechtzehen pfenning, Niclas der Pelndorfer von einem acher vier vnd zwaintzich pfenning, alles wienner mu^enz, di man laerlich dient mit einander an sand Michels tag, Die gu^elt haben wir alle verchauft vnd geben redleich vnd Recht den Erbern gaestlichen herren Bruder Chvnraten, ze den zeiten abt vnd dem Conuent gemain ze dem Heiligen Chreutz vmb sechsthalb pfvnt vnd dreizzich pfenning wienner mvnz, der wir gantz vnd gar verricht vnd gewert sein, mit allen den nvtzen vnd rechten, als der vorgenant Jacob vnd sein vodern die in aygens gewer her pracht habent. Vnd diselben vorgenanten pfenning wir gelegt haben in der purger Spital ze wienne an ander gu^elt, als den Purgern wol chvnt vnd gewizzen ist, Vnd also beschaidenlich, daz di vorgenanten Herren von dem Heiligen Chreutz di egenanten gult fu^erbas ledichleich und vreileich schullen inne haben vnd nvtzen, als ander ir aygenhafts guet, mit versetzen, mit verchauffen vnd geben, sem si wellen, wie in daz aller pest fueget, an allen irrsal vnd an allen chrieg. Vnd sein auch wir mit sampt den vorgenanten Jacoben der egenanten gu^elt ir recht gewer vnd scherm fu^eer alle ansprach, als aygens recht ist vnd des landes recht ze Osterreich. Waer aber, daz in mit recht icht daran abgieng oder chrieges, daz schulle wir in auzrichten an allen irn schaden, Vnd daz schullen si haben vnuerschaidenlich auf vns vnd auf allem vnserm guet, daz wir haben in dem Land ze Osterrich, oder swo wir iz haben, wir sein lebentich oder tod. Vnd daz diser chauf staet vnd vntzebrochen beleib, geben wir in disen brief zv einem warn vnd sichtigem vrchund diser sache, versigelt mit vnsern paiden anhangunden Insigeln‚ vnd mit des Erbern mannes Herrn Sigharts des Prunner, purger ze wienn, der diser sache getzeug ist mit seinem Insigel. Der brief ist geben nach Christes gepurt Dreutzehen Hundert Iar darnach inn dreu vnd fvmftzigistem Iar, an sand Merteins tag.

Source Fulltext: WEIS, Heiligenkreuz (=FRA II/16, 1859) S. 218-219