Wir Albrecht von Gottes gnaden Hertzog ze Osterreich, ze Steyr vnd ze Kernden Tun chunt vmb die zway phunt vnd sechzehen phenning geltes wienner phenning ze Froberch auf behausten holden, auf ekchern vnd auf ainer wisen, di von vns lehen sind vnd di vnser getrewer Albert von Wulfleinsdorf vnd Stephan der Zwikchel verchouft habent den Geistlichen leuten dem Abt vnd dem Conuent ze dem heiligen Chreutz, Daz wir durch Got, vnser vnd vnserer vordern selen hail willen die Lehenschaft derselben zway phunt vnd sechtzehen wienner phenninge geltes den egenanten dem Abt vnd dem Conuent ze dem heyligen Chreutz geben haben vnd geben auch mit disem brief also, daz si die fürbaz innhaben vnd niezzen sullen, als ander ir aygen gut. Mit vrchund ditz briefs Geben ze Wienn an samtztag nach sand Gallen tag nach Christes geburde Drewtzehen Hundert iar darnach in dem Drev vnd fumftzgisten Iar.

Source Fulltext: WEIS, Heiligenkreuz (=FRA II/16, 1859) S. 218