Wir Alber von Gots gnaden Hertzog ze Osterreich, ze Steyer vnd ze Kernden Tůn chund offenlich mit disem brief Vmb den chrieg, den die Erbern vnd Geistlichen Leut, der Abt vnd der Conuent vom Heiligen Chreutz an aim tail, vnd die Augustiner vnd die Gemain ze Paden an dem andern tail, mit einander gehabt habent von des wazzers wegen, das aus dem Gepirg da heraus für Paden rinnet, Daz wir nach irr pet ze baiderseit darzu sanden vnsern getrewen Wolfgangen von Winden vnd Chůnrat den Scho^ennaicher, daz si von vnser wegen beschowten die gebresten, die si baydenthalben ytzund davon hieten, oder der chunftichlich von demselben wazzer mo^echt werden. Die habent daz getan nach iren trewn Vnd habent ouch von vnserm haizzen vnd geschefts wegen darvber gesprochen mit baider tail gunst vnd willen in der weis, als hernach geschriben stet, Daz die Heiligenchreutzer slahe^en sullen ain wazzerstuben, vnd die auzzern wu^er wazzerhalben von der Mül herab, als verr ir Gemercht gent, vntz neben dem Zaun, der si angehört. Vnd ain andrev wu^er sullen si slahen von der wazzerstuben vntz an den steg gen vnser vrown Pad vber, also, daz der Mülgraben hingêe vnd hinrinn zwischen denselben zwayn wu^eren. Vnd sullen si dieselben zwo wu^eren vnd die wazzerstuben pezzern, als oft sein not geschiecht, an der Augustiner ze Paden vnd der gemayn daselbs schaden. So sullen denn die Augustiner vnd die Gemayn ze Paden slahen die wu^er Lantzhalben, als si angeuangen ist, vnd dahin Erd nemmen vnd tragen auz dem Mülgraben, der ytzund news wirt, als vil si derselben Erd bedürffen. Wer aber, daz man die Erd auz demselben Mülgraben nicht gar möcht auftragen zu derselben Wür, daz das wazzer seinen gang vnd fluz vo^ellichlich gehaben mo^echt, so sullen denn die Heiligenchreutzer zwen tail geben vnd die Augustiner vnd die Gemayn den dritten tail, daz man dieselben Erd auz demselben Mülgraben gar auztrag zu der Wu^er, daz das Wazzer sein rechten völligen gang vnd fluz gehaben mûg. Vnd sullen dieselben Augustiner vnd die Gmayn dieselben wu^er lantzhalben pezzern, als oft sein ouch not geschieht, an der Heiligenchreutzer schaden. Ouch sullen die Heiligenchreutzer den vorgenanten Mülgraben fürbaz alletzeit raumen, swenn sein nott ist, an der Augustinern vnd der Gemayn schaden. Davon gebieten wir den obgenanten Heiligenchreutzern vnd den egenanten Augustinern vnd der Gemayn ze Paden vnd wellen gar ernstlich bei vnsern Hulden, daz si die vorgeschriben Stukch vnd artikel, als si von wort ze wort da oben begriffen sind, stet haben vnd vo^elfüren an widered. Swer daz aber vberfu^er, vnd dez nicht tet, den wolten wir darvmb swerlich pezzern. Mit vrchund ditz briefs Geben ze Wienn an phintztag vor Oculi in der vasten, Nach Christes gepurd drewtzehen hundert Iar, darnach in dem siben vnd fünftzigisten Iar.

Source Fulltext: WEIS, Heiligenkreuz (=FRA II/16, 1859) S. 231-232