Nos Capitulum ecclesie Jauriensis memorie commendamus, quod nobilis vir Johannes, filius Nicolai, dicti Aykas de Lesansuk siue de Lendorph, nostram adeundo presenciam exhibuit nobis litteras Capituli Castriferrei patentes petens nos instanter, ut copiam earumdem Fratri Syfrido, magistro curie monachorum de novo predio, pro maiori certitudine in forma transsumpti sub nostro sigillo dare dignaremur. Tenor autem earundem talis est: Nos Capitulum ecclesie Castriferrei memorie commendamus, quod magister Johannes, filius Nicolai, dicti Aykas de Iwanch, ab una‚ parte vero ab altera Nicolaus et Dominicus, filii eiusdem Nicolai, dicti Aykas, de eadem Iwanch, coram nobis pariter constituti confessi extiterunt oraculo uiue uocis eo modo, quod ipsi super facto possessionarum porcionum eorum in possessionibus, videlicet Lesansuk, Hegyeshobn, Kalmuk, Wyllie et Tordamez vocatis‚ in comitatu Mosoniensi existentibus, habitarum, nunc per manus alienas occupatiue existencium, taliter concordassent et concordarunt coram nobis, vt, quia predictus magister Johannes easdem possessionarias porciones ab ipsis manibus alienis propriis laboribus et expensis requirere, et reoptinere ac etiam predictos Nicolaum et Dominicum super omnibus iudiciis et iudiciorum grauaminibus, si in aliquibus, in execucione earum premissarum porcionum, quod absit, agrauerentur et convincerentur modo simili cum suis rebus et laboribus expedire assumpsit, ideo si idem magister Johannes ipsas possessionarias porciones in toto, uel aliquam partem, seu particulam earundem quouis modo, siue per modum pacis, siue per formam litis materie reinvenire et optinere poterit, extunc easdem dicti magister Johannes a festo beati Michaelis archangeli proximo venturo, usque ad quintam eiusdem festi reuolucionem, scilicet ad spacium quatuor annorum integrorum possidendi, tenendi et conseruandi, vtilitatesque earundem quaslibet pro se percipiendi, uel etiam quibuscumque voluerit usque complecionem predictorum quatuor annorum integrorum pignori obligandi, plenam habebit facultatem, sed completis ipsis quatuor annis integris in predicta reuolucione annuali festi prenotati easdem ab omnibus grauaminibus, in quibus per eundem magistrum Johannem usque terminum prefixum eedem possessionarie porciones agrauari dinoscerentur, expedire et deliberare, ac ipsas coram nostro testimonio per nos ad id deputando cum prescriptis Nicolao et Dominico, fratribus suis diuidendo, porciones ipsorum eisdem de ipsis possessionariis porcionibus extradare tenebitur. Si vero id facere noluerit, vel non potuerit, ex tunc usque dum porciones eorundem Nicolai et Dominici eisdem libere remiserit et resignauerit, ipse magister Johannes eosdem citandi non habebit facultatem. Preterea litteras ipsorum super ipsis porcionibus possessionariis confectas et emanatas, uel emanari debendas in communi loco et conseruatorio tenere et conseruare debebunt. Sicut omnia et singula premissorum per partes prescriptas extitit ordinatum et voluntarie assumptum coram nobis. Datum feria secunda proxima ante festum beati Michaelis archangeli prescriptum anno domini M°. CCC°. L^mo. octauo.||
Nos igitur eiusdem Johannis peticionem considerantes, fore iustam easdem litteras capituli annotati, sub nostro sigillo transscribi fecimus. Datum Sabbato proximo ante dominicam Reminiscere anno domini M°. CCC°. L^mo. Nono.

Source Fulltext: WEIS, Heiligenkreuz (=FRA II/16, 1859) S. 245-247