Ich Jacob der Richter Vnd pei gesworn puriger ze Prespu^erch Wir verichen offenlich mit dem brief allen den, die in sehent oder horent lesen, die nv sind vnd her nach chvnftig werdent, Daz für vns chomen ist die Ersam vraw vraw Geysel Wölfleins dez weissen witib dez vleischaker, dem Got gnad, vnd hat durich ir sel hail vnd auch durich der andach willen, die si zv dem Orden hat hintz dem Heyligen Chreutz, daz do leit in Passawer Pistum, vnd durich irer vordern sel hail willen vnd auch durich Petreins irz Ennichleins willen, der sich mit andacht in daz Chloster geben hat, Geschaft vnd geben hat redleich vnd recht mit verdachtem mu^et zv der zeit, do si iz wol getu^en mocht, vnd nyemen wider sprechen mocht, geschaft vnd geben hat in das egenant Chloster ain Haus, daz si hat in der Stat ze nachst der Chlain Gazzen, da man get zv der Nvnnen Chloster, anderhalb ze nachst Niclas Chuneins haus mit allen den rechten vnd nutzen, alz iz die vorgenant vraw Geysel an eribs stat ingehabt hat, vnd auch mit der selben Swaer, Also daz di selben Herren, oder wer iz nach in busitzt, davon dienen schullen zway phvnt geltz ewigs Purchrechtz der mu^enz, di gibig vnd gaebig ist in der Stat ze Prespurch vnd schullen daz dienen, alz der Stat recht ist. Vnd ein weingarter, der haist der vreyheit vnd leit ze nachst Ekleins des Smitz weingarten, vnd anderthalb zenachst dem weg, der zv dem Olram get; Vnd derselb weingart dient drey emmer weins alle iar. Vnd ain weingarten, der haist der Czebinger vnd leit vnder den Murren vnd anderhalb zenachst dem weg, der do get zv dem weingarten, der do haist der vinger Hu^et. Vnd auch Czwelif schilling geltz Ewigs Pu^erchrechtz auf einem haus in der stat zunachst Chunratz des Rumphs haus, anderhalb zenachst der Herren Hof von dem Heyligen Chreutz, daz man haist datz sand Katrein; aber also, daz di egenant vraw Geysel diselben zwelif schilling geltz innhaben scholl vntz an irn tod; vnd darnach geuallen schulln in daz vorgenant Chloster. Vnd ist auch mer ausgenomen mit ausgenomen war, also, daz der Abt vnd der Conuent datz dem Heyligen Chreutz alle die vorgenanten gu^eter verchauffen schullen vnd daz anlegen, wa iz dem Chloster aller nutzleichist sey, wa si wellen. Vnd daz di Sach vor vns also gewandelt vnd geschehen ist vnd auch furbas staet vnd gantz beleib, so geben wir in darvber disen brief, versigelten mit vnser Stat anhangenden insigel ze einem offem vrchunde vnd warn gezeug der Sach. Der brief ist geben nach Christes gepu^erd dreutzehen Hvndert Iar darnach in dem Nevn vnd fvnftzgisten Iar, des nachsten Phintztags nach sand Vilips vnd sand Jacobs tag.

Source Fulltext: WEIS, Heiligenkreuz (=FRA II/16, 1859) S. 247-248