Lodouicus dei gracia Rex Hungarie, fidelibus suis magistro Jakch, comiti Mosoniensi et castellano de Owar vicesque eiusdem gerentibus salutem et graciam. Religiosus vir Frater Colomannus abbas monasterii sancte Crucis de Austria nostram adiens conspectum exhibuit nobis tenorem litterarum priuilegialium Inclyti principis olim domini Karoli Regis Hungarie, nostri genitoris recordacionis felicis, sub pendenti et autentico sigillo honorabilium virorum Capituli ecclesie Posoniensis de verbo ad uerbum transumptum, in cuius serie inter cetera vidimus contineri, quod curie ipsius monasterii sancte Crucis vna videlicet, que curia Regis appellatur circa aquam Lytta, secunda nouum predium et alio nomine Newneygen dicta, ac Villa Winden vocata iuxta lacum Fertu, in regno nostro existentes ab omnibus daciis et solucionibus collectarum‚ seu aliarum taxacionum‚ regio nomine faciendis, libere sint omnino et exempte, et quod omnes causas inferiores, factum mortis non contingentes, fratres ipsius monasterii vel eorum officiales possint in dictis curiis et villa iudicare. Item, quod res et bona quelibet colonorum et iobagionum in eisdem curiis et villa residentibus, qui pretextu alicuius capitalis nocumenti ad mortem per iudicem, ad quem hoc pertinet, iudicarentur et ad manus deuolui debeant fratrum predictorum, subiungentes idem abbas voce querulosa, quod vos multas in supradictis curiis et villa nouitates iuri contrarias faceretis. Nam de omnibus causis in iudiciis eorundem curiarum et ville, quocunque ipsarum libertates, vos intromisissetis, iudicaveritisque ibi omnes causas inferiores, quas officiales sui deberent iudicare et quod iobagiones ac colonos suos in prefatis curiis et villa residentes, per inconswetarum et nouarum taxacionum inposiciones et extorsiones nec non per descensus frequentes victualium recepciones et per alia grauamina nimium angariaveretis, et adeo disturbaretis, quod ipsos abinde inuitos recedere oporteret, nisi eis de salubri et oportuno remedio prouideatur. Verum cum nos vniuersas possessiones predicti monasterii sancte Crucis in regno nostro vbilibet existentes, specialiter curias et villam predictas ob reuerenciam beatissime Crucis, affectumque specialis deuocionis, quam ad ipsum monasterium gerimus, in nostram regiam, sicuti genitor noster predictus fecisse demonstratur, recepimus proteccionem et tutelam specialem, uolumusque ex hoc populis easdem in inhabitantibus preiudicia vel iniurias per quospiam inferi seu grauari aliquales, volumus et vestre fidelitati firmissime precipimus et mandamus, quatenus amodo et deinceps nullas causas in curiis et villa supradictis, exceptis causis factum mortis, vt premittitur, contingentibus, iudicare presumpnatis, sed eas officialibus ipsius abbatis et fratrum monasterii predicti commitatis iuxta priuilegiatas libertates siue prerogatiua iudicandas, nec de rebus et bonis hominum seu iobagionum suorum de eisdem curiis et villa‚ morte per iudiciariam sententiam condempnatis, aut condempnandis vos intromitatis. Ceterum ab inposicionibus et extorsionibus nouarum et per vos adinuentarum seu adinueniendarum taxacionum illacionibusque aliarum quarumcumque grauaminum in ibi amplius faciendis omnino desistatis, non audentes, abbatem et fratres monasterii predicti, eorumdemque jobagiones et colonos, per descensus frequentes et victualium recepciones in antea molestare, ymo eos in iuribus et libertatibus suis antiquis illesos et indempnes conseruando ab omnibus indebite molestare volentibus protegere debeatis et tueri in persona nostre maiestatis, secus pro nostra gracia et dileccione non facturi in premissis; et hoc idem iniungimus comitibus Mosoniensibus et castellanis de Owar eorumdemque vices gerentibus in futurum constituendis, dantes eis firmissimis in mandatis. Datum Posonii in festo Corporis Christi anno eiusdem M°. CCC^mo. lx^mo. secundo.

Source Fulltext: WEIS, Heiligenkreuz (=FRA II/16, 1859) S. 268-269