Wir Alber vnd Leupolt Gepru^eder von Gotes gnaden Hertzogen ze O^esterreich, ze Steyr, ze Kernden vnd ze Chrayn, Grafen ze Tyrol etc. Bechennen vnd tu^en chunt offenlich mit disem brief, vmb den Hof datz Symaning gelegen, den Chůnrad der Vorlauff, vnser purger ze Wyenn von den erbern vnd geistlichen Herren Abt Cholman vnd dem Conuent ze dem heiligen Chrevtz, vnsern lieben andechtigen gechouft het ze rechtem Purgrecht, und darvmb derselb vorlauff für vns kam vnd gab vns für, er wer von vns ze Lehen vnd pat vns, das wir den Jansen seinem Svn lihen; Daz wir beweiset sein von demselben Abte vnd von andern erbern, daz der egenant Hof ze purgrecht wer, vnd nicht ze Lehen; vnd daz man dieselben geistlichen Leute vmpillich vnd widerecht des egenanten Hofs entwert hiet, seind er nicht ze Lehen wer. Davon mainen wir vnd wellen ernstlich, Daz die vorgenant geistlichen Levte bey dem egenanten Hof vnd bey allen den nutzen vnd rechten, eren vnd wirden, die darzu gehorent, vnd als si den vormals da habent innegehabt, beleiben sullen in aller der weise, als bey andern irn aygenen Gu^etern. Vnd sein ouch wir darauff ir scherm vor gewalt vnd vor vnrecht. Hat yemant dawider icht ze sprechen, der tu das mit den rechten an den stetten, da er es pillich tun soll. Mit vrchund ditz briefs Geben ze Wyenn an dem heiligen abent ze Phingsten Nach Christes gepurt Dreutzehenhvndert Iar Darnach in dem Sibentzigisten Iare.

Source Fulltext: WEIS, Heiligenkreuz (=FRA II/16, 1859) S. 292