Urbanus episcopus seruus seruorum dei Dilecto Filio Abbati Monasterii Scotorum in Wyenna, Patauiensis diocesis, Salutem et apostolicam benedictionem. Ad audientiam nostram peruenit, quod tam dilecti filii . . Abbas et Conuentus Monasterii sancte Crucis ordinis Cisterciensis Patauiensis diocesis, quam predecessores eorum decimas, redditus, terras, vineas, possessiones, domos, castilia, prata, pascua, grangias, nemora, molendina, iura, iurisdictiones, et quedam alia bona ipsius Monasterii datis super hoc litteris, confectis exinde publicis instrumentis, interpositis iuramentis, factis remunerationibus et penis adiectis in grauem ipsius Monasterii lesionem nonnullis clericis et laicis, aliquibus eorum ad uitam, quibusdam uero ad non modicum tempus et aliis perpetuo ad firmam uel sub censu annuo concesserunt, quorum aliqui dicuntur super hiis confirmationis litteras in forma communi a sede apostolica impetrasse. Quia uero nostra interest, super hoc de oportuno remedio prouidere, discretioni tue per apostolica scripta mandamus quatinus ea‚ que de bonis prefati Monasterii per concessiones huiusmodi alienata inueneris illicite uel distracta, Non obstantibus litteris, instrumentis, iuramentis, remunerationibus, penis et confirmationibus supradictis ad ius et proprietatem ipsius Monasterii legitime reuocare procures, Contradictores per censuram ecclesiasticam appellatione postposita compescendo. Testes autem qui fuerint nominati, si se gracia, odio uel timore subtraxerint, censura simili appellatione cessante compellas ueritati testimonium perhibere. Datum Viterbii XV. Kalendas Junii, Pontificatus nostri Anno Octauo.

Source Fulltext: WEIS, Heiligenkreuz (=FRA II/16, 1859) S. 291