Wir Albrecht vnd Leupolt bru^eder, von gotes gnaden Hertzogen ze O^esterreich, ze Steyer, ze Kernden, vnd ze Krain, Grafen ze Tyrol etc. Bekennen vnd tun kunt offenlich mit diesem briefe, Wiewol das sey, Daz wir aygenlich vnd kuntlich bewiset wêren, daz der Hof ze Symoningen gelegen, den Wir Jansen, Chůnrats des Vorlauffs Svne, vormals zu einem lehen gelihen hatten, der erbern geistlichen vnserr lieben andechtigen des Abts vnd des Conuents des Klosters ze dem Heiligen Chreutz recht aygen vnd von vns nicht ze lehen sei, vnd daz si des vnbillich vnd wider Recht entweret waren, vnd wir si ouch des wider gewaltich machen vnd in gewer setzen vnd darauffe schirmen hiezzen, als das alles wol beweiset der Schermbrief, den wir denselben klosterluten daruber gegeben haben; Do wart darnach aber den egenanten klosterluten derselb Hof ze Symoningen von den obgenanten . . dem Vorlauff vnd seinem Svn, so vere ze kriege getan, daz wir vns der gewer des Hofs zu vnsern handen vndertzugen, Also, daz si für vnsern Lantmarschalich vnd vnser herren mit iren briefen vnd vrkunden komen solten, vnd da das Recht sich darumbe vergeen lazzen. Darnach hat sich das Recht darumbe vor dem egenanten vnserm Lantmarschalich vnd den Herren erfunden, als das volliklich beweiset desselben vnsers Lantmarschalichs brief, den er versigelten mit seinem Insigel daruber gegeben hat in solichen wortten, als hienach geschriben stet. (Folgt die unmittelbar vorhergehende Urkunde Nr. CCLXVI.) Darumbe nach rate vnserer Herren vnd vnsers Rates vnd mit recht wizzende wellen wir ernstlich, daz ez ouch furbaz also gehalten werde vnd daz die vorgenant Klosterlute vnd das Kloster bey der gewer des vorgenanten Hofs vnd aller der nutzen vnd Rechten, die dartzu gehörent, ruwiklich beleiben vnd daz in nieman dawider kein Inual noch irrung tu in dheinen weg ane allez geuer. Darumb gepietten wir vnserm Lantmarschalich in Österreich, wer der ye zu den zeitten ist, vnd wellen, daz er die egenanten Klosterleute vnd daz Gotzhaus bei dem vorgenanten Hof, vnd aller seiner zugehörunge von vnsern wegen ewiklich halte vnd schirme vestiklich vor allem gewalte vnd vnrechte. Mit vrchund ditz briefs Der geben ist ze Wienn an Mitichen vor dem Heiligen Phingsttag Nach kristes gepurde dreutzehenhundert iar vnd darnach in dem Ainem vnd Sibentzigistem Iare.

Source Fulltext: WEIS, Heiligenkreuz (=FRA II/16, 1859) S. 293-294