Ich Niclas von Eslarn, hern Vlreichs seligen sun von Eslarn, vergich vnd tun chunt allen den, die den brief lesent oder horent lesen, die nv lebent vnd de hernach chunftich sint, Das ich mit aller meiner Erben gutem willen vnd gunst, mit wolbedachtem mu^et vnd nach Rat meiner frewnde, zu der zeit, do ich es wol getun mochte, verchaufft han vor rechter ehafter not von des geltes wegen, das ich schuldig pin gewesen hintz dem Juden, meins rechten vaeterleichen Erbguts, mein zwen weingarten, die hernach benant sint. Des ersten mit meins pergmaisters hant Jansen des Vyntzler von Chritzendorf, zu den zeiten amptman der Edlen vrown vrown Agnesen, hern Josten seligen wittiben von Rosenberch, meinen weingarten gelegen ze Newnburch chlosterhalben an dem mitterekke, des ein Jeuch ist, zenechst hern Jacobs weingarten von Tirna, di man von dem egenanten meinem weingarten alle iar dient der vor genanten vrown von Rosenberch zwen emmer weins vnd zwen phening ze perchrecht vnd drey phening ze Voitrecht zu dryn Etaydingen im iare, ainen phening des nechsten Erichtags nach sand Jörigen tag, ainen phening dez nechsten Erichtags nach vnser vrown tag zu der Schidung, vnd ainen phening des nechsten Erichtags nach vnser vrown tag ze der Liechtmesse vnd nicht mer vnd mit meins pergmaisters hant, Petreins des Staengleins von Newnburch chlosterhalben, zu den zeiten hern Stephanns amptman des Schekchen, meinen weingarten gelegen ouch daselbens ze Newnburch an dem mitterekke, des drew viertail eins Jeuchs sint zenechst hern Hainreichs weingarten des pharrer ze Tulln, do man alle iar von dient hern Stephan dem Schekchen sechs viertail weins vnd drey helbling ze perchrecht vnd drey phening ze voitrecht zu den dryn Etaidingen im iar, ainen phening des nechsten Erichtags nach sand Jörigen tag, vnd ainen phening des nechsten Erichtags nach vnser vrown tag ze der Schidung, vnd ainen phening des nechsten Erichtags nach vnser vrown tag zu der Liechtmezze vnd nicht mer. Die vorgenanten zwen weingarten han ich recht vnd redleich verchoufft vnd geben mit allen den nu^etzen vnd rechten, alz ich si vnuersprochenleich in perchrechts gewer herpracht han vnd alz si mit alter herchomen sint, vmb hundert phunt vnd vmb achtzich phunt wienner phening , der ich gantz vnd gar gewert pin, Den erbern geistleichen herren Pruder Cholmann zu den zeiten Abtt vnd dem Conuent gemain des chlosters datz dem Heiligenchrawtz vnd allen irn Nachkomen fürbas ledichleich vnd vreileich ze haben vnd allen irn frumen damit ze schaffen, verchouffen, versetzen vnd geben, wem si wellen an allen irrsal. Vnd durch pezzer sicherhait willen setzen wir vns, ich obgenanter Niclas von Eslaren vnd ich Niclas von Eslaren von dem Clemens, sein vetter vnd all vnser Erben vnuerschaidenleich vber die vorgenanten zwen weingarten den egenanten geistleichen herren gemaine datz dem Heiligenchrawtz vnd allen irn Nachkomen ze rechtem gewern vnd scherm für alle ansprach, als perchrechts recht ist vnd des Lanndes recht ze Österreich. Wer aber, daz si fürbas mit recht an denselben zwain weingarten icht chriegs oder ansprach gewunnen, von wem das wer, was si des schaden nement, das sullen wir in alles ausrichten vnd widerchern an allen irn schaden. Vnd sullen ouch si daz haben auf vns vnuerschaidenleich vnd ouf allem vnserm Güt, das wir haben in dem Lannde ze Österreich oder wo wir es haben, wie das genant ist, wir sein lebentich oder tod. Vnd das der chouff fürbas also stet vnd vntzebrochen beleibe, Darüber so geben wir In den brief zu einem warn vrchunde vnd zu einer ewigen vestnunge der sache versigilten mit mein obgenants Niclas insigil von Eslarn vom Clemens vnd mit der vorgenanten zwayer pergmaister insigiln, Jansen des Vyntzler vnd Petreins des Staengleins vnd mit hern Chunrats insigil des Vrbetschen, zu den zeiten des Rates der Stat ze Wienne, die wir des gepeten haben, daz si der sache gezewgen sint mit irn insigiln. Vnd wannd ich obgenanter Niclas von Eslarn, hern Vlreichs sun selber nicht aigens insigils han, so verpinde ich mich mit meinen trewn an alles geuerde vnder den vorgenanten insigiln, alles das gentzleich stet ze haben vnd ze laisten, das vor an dem brief geschriben stet. Der geben ist ze Wienne nach Christes gepurde drewtzehenhundert iare darnach in dem zwai vnd Sibentzgistem Iare, des nechsten Montags vor der heiligen Mârttrer tag sand Tiburcii vnd Valeriani.

Source Fulltext: WEIS, Heiligenkreuz (=FRA II/16, 1859) S. 294-296