Ich Gerung der Redler Von Sichtenberkch vnd ich Agnes sein Hawsfraw, Vlrich dez Spans tochter, vnd all vnser baider Erben vergehen vnd tun kunt offenlich mit dem brief allen den, di in sehent, hörnt oder lesent, di nu lebent vnd hernach chünftig sind, Daz wir mit wolbedachten mut vnd mit gesampter hant zu der zeit, da wir ez mit recht wol getun machten, Recht vnd redlichen verchauft haben Vnsers rechten ledigen frein aigens, Von erst: datz Dreschirchen tzwelif schilling vnd dreizehen wienner phenning vnd ainen helbling gelts auf behausten gütern, vnd der dint Mert der Chornner vnd sein muel von ainem hof ain halb phunt phenning gelegen im winchel ze nachst dem chöndlein, der Pehem auf der Hochstrazz von ainem hof ainen vnd achtzig phenning, Peter weber sein genachtpawr von ainem hof ainen vnd achtzig phenning, vnd Vlreich der Pawr bey dem tor von ainem pawmgarten drei schilling phenning, vnd daselbs auf vberlend ain phunt minner virtzehenthalben phenning gelts. Darnach ze Gunderstorf zwai phunt minner sechs phenning gelts, von erst: Symon der Pawr von seinem hof bey dem Düring ain halbs phunt phenning vnd daselbs auf vberlende zwelf schilling minner sechs phenning gelts; darnach ze Entsthestorf dreitzehen schilling minner ainem helbling gelts, von erst: Gorig Guemols zwen vnd dreizzikch phenning von seinem haws, Wölfel Pekch von seinem haws sechtzehen pfenning, Thoman Schäwtz zwaintzich phenning von seinem haws, vnd Hanns auf der hülbin von ainem haws vnd von ainem weingarten daselbs sechtzehen Emmer weins; vnd di vbring phenning gült ligent daselbs auf vberlende. Darnach haben wir verchauft zwen Emmer weins Perchrechts gelegen zwischen Entschestorf vnd Prunn, der dient: Jensel von Reinprechtstorf ainen Emmer vnd zwen phennig gelegen ze nachst dem Phaffen, vnd Nicla vastzieher ainen Emmer vnd drithalben phenning gelts; vnd darnach haben wir verchauft achthalben Emmer Perkchrechts gelegen ob Gumpoltzchirchen vnder dem hohen chogl. Di vorgenanten gült mit alle di vnd darzu gehört, ze wald vnd ze veld, vnd ze dorff, gestift vnd vngestift, versucht vnd vnuersucht, wie daz genant, oder wo daz gelegen ist, mit allen nützen vnd rechten, als wir daz allez vnuersprochenlich in aigens gewer inngehabt vnd herpracht haben, haben wir verchauft vnd geben vmb hundert phunt wienner phenninge, der wir gentzlich verricht vnd gewert sein, dem Erbern chnecht, Micheln von Wiltek vnd seinen erben fürbas ledichlich vnd freilich ze haben vnd allen irn frum damit schaffen, verchauffen, versetzen vnd geben, wem si wellent an allen chrieg vnd irsal. Vnd sein wir dez ir recht gewern vnd scherm für alle ansprach, als aigens vnd des Landes recht in Osterreich. Get in aber fürbas daran icht ab mit recht, oder ob si mit recht icht chrieg oder ansprach daran gewünnen, von wem das wer, das sulln wir in allez ausrichten vnd widercheren vnd sullen si daz haben datz vns vnuerscheidenlich vnd auf all dem gut, daz wir haben, oder noch gewinnen in dem Lande ze Österreich, oder wo wir daz haben, wir sein lebentig oder tode. Mit vrchund des briefs besigilten mit mein obgenanten Gerungen Insigl des Redler vnd der sach sind gezewgen Mert der Redler mein pruder, Paul der Redler mein vetter, Peter der Prehafen, der obgenanten Agnesen meiner hawsfrowen Öhaim, vnd Heinreich der Schekch mit iren Insigiln, di wir darumb vleizzig gepeten haben, daz si der sach getzeugen sint. Wann ich obgenante Agnes Vlrich dez Spans tochter selb aigens Insigils nicht enhet, darumbe so verpind ich mich vnder der egenanten Gerungs dez Redler meines wirts, Petreins dez Prehafen, meines ohaims vnd Heinreichs dez Schekchen Insigiln mit meinen trewn, allez daz gentzlich stet ze haben, daz vorgeschriben stet an ales geuerde. Geben nach Christi gepurde Drewtzehen hundert iar vnd darnach in dem fümf vnd Sibentzkistem iare, dez Mentags nach sand Niclas tage.

Source Fulltext: WEIS, Heiligenkreuz (=FRA II/16, 1859) S. 305-307