Ich Thoman Jordans sun von Lestorf vnd ich Erhart vnd ich Niclas sein sun vnd ich Margret sein töchter vnd vnser aller erben veriehen offenlich mit dem brif, daz wir mit vnserr erben guten willen vnd gunst, mit verdachtem müt vnd mit vnsers Purchheren hant, hern Christans des Techenstaner, zu der zeit, do wir ez mit recht wol getün möchten, varchawft haben vnser weingart setz, die do haizzet der Raifal acker, vnd das wismad vnd den acker, der daran stozzet, vnd was darzue gehöret, vnd haizzet an dem Hetzmanssagel, do man owch von der egenanten Weingart setz, vnd was darzue gehöret, alle iar dienet dem egenannten Purchheren an sand Michels tag dreizzig wienner phenning vnd nicht mer. Die vorgenanten weingart setz vnd waz darzue gehöret hab wir recht vnd redlich verchawft vnd geben vmb fünf vnd dreizzig phunt wien-ner phenning, der wir gantz vnd gar verricht vnd gewert sein und von den Jvden vnd domit geledigt haben. Den erwern geistichen herren, Abt kolmann vnd dem Conuent gemain datz dem Hegligen chrawtz fürbas allen irn frum domit ze schaffen, versetzen, verchawffen vnd geben, wem si wellent an alle irrung. Wer awer, daz in an der vorgenantn weingart setz vnd was darzue gehöret, mit recht icht abgieng oder zuesprüch gewünnen, von wem daz wer, daz süllen wir in alles ausrichten an alle ir mue, vnd süllen se daz haben owf allem vnserm güt, daz wir haben in dem land ze Österreich, wir sein lebentig oder tod. Vnd wann wir selbe nicht aygner Insigel haben, darvmb so geb wir in disen brif ze einem warn vrchund der sach versigelt mit vnsers obgenanten Purchherrn Insigel vnd mit des erwern manns Insigel, hern Hainreichs des Püchel, die zeit Purgraf datz Rawhenstain. Der brif ist geben nach Christi gepurt drewzehen hundert iar, darnach in dem acht vnd Sibentzgisten iar, an vnser vrowen tag ze der Liechtmesse.

Source Fulltext: WEIS, Heiligenkreuz (=FRA II/16, 1859) S. 319-320