Ich Jörig vnd ich Rüger die Smidbekchen vnd all vnser Erben Wir vergehen vnd tun kunt allen den, die den brief lesent oder hörent lesen, die nv lebent vnd hernach chünftig sint, Vmb das phunt wienner phenning geltes, das die erbern Geystleichen Herren der Abt vnd der Conuent des Chlosters datz dem Heiligenchrewtz habent auf vnserm Hof gelegen ze Münichdorf vnd auf alle dem, das dartzu gehöret, es sey gestifft oder vngestifft, versucht oder vnuersücht, wie das genant ist, das man In alle iar dauon dient an sant Michels tag ze rechtem Purchrecht, damit si desselben Hofs vnd alles des, das dartzu gehöret, Recht Purchherren sint ze stiften vnd ze störn nach des Landes recht ze Österreich, und dasselb phunt gelts wir In emphremdet heten; Darumb auch si denselben Hof mit aller seiner zugehörung gentzlich in der Hofschrann ze Wienn erlangten vnd behueben mit dem rechten, Das wir die vorgenanten erbern Geistleichen Herren erpeten haben mit erbern Herren vnd Lawten, das si vns des vorgenanten behabens, so si den egenanten Hof vnd swas dartzu gehöret getan heten, ledig lassen habent vnd vns den behabbrief, der In darüber gegeben was, dartzü in vnser gewalt gegeben habent, also mit ausgenomen worten, das wir vns verlübt vnd verpunden haben vnd verpinden vns mit dem brief, das wir vnd all vnser Nachkomen, die den vorgenanten Hof vnd swas dartzü gehöret, nach vns innhabent vnd besitzent, den egenanten Herren datz dem Heiligenchrewtz vnd allen irn Nachkomen das vorgenant phunt geltes fürbas ewichleich dienen vnd In das alle iar an sant Michels tag raichen süllen in dasselb ir Chloster selb oder mit vnserm poten richtichleich an alles vertziehen. Auch verpinden wir vns gegen In mit dem brief, ob das wer, das wir oder vnser Nachkomen‚ die den vorgenanten Hof, vnd swas dartzü gehöret, nach vns innhabent und besitzent, der Güter, die in denselben Hof gehörnt, wie die genant sint, icht verchaufften oder versatzten oder verchumerten, oder autz demselben Hof verwandelten oder enphremdeten an der egenanten vnserer Purchherren wizzen vnd an ir hant vnd willen, das In denn zehand derselb Hof vnd alles das, das dartzü gehöret, nichts ausgenomen Ledichleich sol veruallen sein an all gnad. Vnd das alles ze einem warn offen vrkünd geben wir für vns vnd alle vnser Erben vnd Nachkomen In vnd allen irn Nachkomen den brief versigilten mit vnsern insigiln vnd mit der erbern Herren insigiln, Hern Leutolts von Meichssaw, Herrn Wülfings vnd Herrn Merten gebrüder von Planchenstain, die wir des vleizzichleich gepeten haben, das si der sach gezeugen sint mit irn insigiln, In an schaden. Der brief ist geben ze Wienn nach Christes gepürt Dreutzehenhundert iar darnach in dem Acht vnd Sybentzgistem iar, an sant Cholmanns Tag.

Source Fulltext: WEIS, Heiligenkreuz (=FRA II/16, 1859) S. 321-322