Capitulum ecclesie Jauriensis omnibus christi fidelibus tam presentibus quam futuris presencium noticiam habituris salutem in domino sempiteram. Ad vniuersorum noticiam harum serie volumus fieri manifestum, quod nobiles viri magistri Johannes filius Symonis, Gregorius et Nicolaus filii Belyd de Heflengen ab una parte, ex altera vero Religiosus vir frater Johannes, Prior ecclesie sancte Crucis de austria pro Religioso viro domino fratre Colomano abbate predicte ecclesie sancte Crucis coram nobis constituti per prenominatos magistros Johannem filium Symonis, Gregorium et Nicolaum, filios Belyd confessum extitit et relatum ministerio viue uocis quod, quamuis inter ipsos graues discordie perturbacionesque innumere et ubique pro quadam particula terre inter possessionem predicti domini Colomani abbatis, Pothusdorf vocatam et eorumden nobilium Belyd vocitata existentis a longo temporis spacio ventillate fuissent, tandem per ordinatos proborum nobilium virorum eandem particulam terre ex certa racione pertinere agnoscentes, ad prenominatam possessionem Pothusdorf supradicti domini abbatis, ne ipsi et ipsorum successores pro vlteriori disceptacione, occupacione uel vtensione vtilitatis eiusdem terre premio beatitudinis eterne et lucis felicitate priuaretur, predictam particulam terre litigiose cum omnibus suis pertinentibus annotato domino fratre Colomanno, abbate et dicte possessioni ecclesie sue Pothusdorf sub infrascriptis metis uel metarum renouationibus in perpetuum resignassent, ymo resignauerunt et renunciauerunt coram nobis tamquam Jura et proprietates dicte ecclesie possidere atque habere nichil Juris vel proprietatis sibi ipsis uel eorum posteris amplius in eadem reseruando, cuius quidem terre metas predicte partes tali ordine reambulatas renouatas et erectas fuisse retulerunt, quod prima meta inciperet a parte meridionali in magna valle et ibi essent tres mete terree quarum vna nunc renouata a plaga occidentali predicta possessiorie Pothusdorf, altera vsque septemtrionem pro iure possessionis ecclesie sancti Georgii, et tercia meta pro eadem possessione Belyd prefatorum nobilium versus orientem forent distinquentes, et ipsa valle egrediendo ad partem aquillonariam ad longitudinem decem Iugerum terrarum nobilium, prout se secundum consuetudinem illius prouincie computatorum ad aliam vallem sanquissugarum in vulgari eggulgionch nominatam tendendo, et ibi vnam metam cursualem ipsas duas possessiones domini abbatis et prefatorum nobilium ab invicem separantem renouassent; de hinc ad partem occidentalem flectendo et iterato ad spanum longitudinis dicte Iugerum terre eundo in quodam loco aquoso et bitoso in vulgari bachlab nomine erexerunt due mete antique, quarum vna ab orientis plaga pro possessione Belyd supradictorum nobilium, altera vero vsque occidentem existens et pro nunc renouata pro possessione Pothusdorf distinguere deberet, vlterius ad occidentem declinando ad quemdam montem, lebeu vocatam, penes lacum fertheu appellatum adiacentem eundo et in eodam monte vnam nouam metam erexissent, et ibi cursus metarum supradictarum duarum possessionum Pothusdorf et Belyd terminaretur In cuius rei memoriam perpetuamque firmitatem ad presencium peticiones presentes concessimus literas nostras priuilegiales, pendentis et autentici sigilli nostri munimine roboratas. Datum in festo sancti Laurencii martiris anno domini Millesimo CCC° lxx^mo. nono dominis Volrando preposito, Petro lectore, Joanne cantore, Dominico custode ceterisque dominis et canonicis ecclesie nostre existentibus et deo seruientibus.

Source Fulltext: WEIS, Heiligenkreuz (=FRA II/16, 1859) S. 324-325