Wir Albrecht von gots gnaden Hertzog ze Osterreich, ze Steyr, ze Kernden vnd ze Crain, Graf ze Tirol etc. Tun kund offenleich mit disem brif Vmb die guter ze Wetzelndorf, die Kristans daselben von Wetzelndorf gewesen sind vnd die Rotleyn vnserm Juden von Newnburg Markt halben von demselben Kristanen verstanden sind, vnd die der egenant Jud Rotel verchoufft hat den erbern geistlichen vnsern lieben andechtigen . . . dem Abt vnd dem Conuent ze dem Heiligen Chreutz, alz der Judisch koufbrief sagt, den si von im darumb habent, Daz wir derselben guter aller den egenanten klosterleutt ze dem Heiligen Chreutz scherm sein vor gwalt vnd vor vnrecht nach des egenanten Judischen brief sag. Mit vrkund ditz briefs Geben ze wienne an Phintztag vor sand Vlreichstag Nach Kristi gepurde Dreutzehen Hundert iar darnach in dem Newn vnd Sibentzigistem iare.

Source Fulltext: WEIS, Heiligenkreuz (=FRA II/16, 1859) S. 323-324