Nos frater Michael Abbas Monasterii de Arabona. Ordinis Cisterciensis Theatinae diocesis, ejusdem ordinis Vicarius generalis, authoritate apostolica deputatus venerabili in Christo patri, domino Colomanno coabbati et monachis ceterisque personis Monasterii sancte Crucis in Austria dicti ordinis, Patauiensis diocesis salutem in domino sempiternam. Notum facimus per presentes, nos litteras siue bullas pro personis ipsius ordinis a Sanctissimo in christo patre et domino nostro domino Vrbano diuina prouidentia papa Sexto eius vera bulla plumbea in filis sericis crocei et rubei coloris inpendens bullatas, non viciatas, non cancellatas, nec in aliqua sui parte suspectas, sed prorsus omni vicio et suspicione carentes, obtinuisse et recepisse, quarum tenor de uerbo ad uerbum sequitur et est talis: Urbanus episcopus seruus seruorum dei Dilectis filiis vniuersis abbatibus, prioribus et monachis, ceterisque personis vtriusque sexus Cisterciensis ordinis Salutem et apostolicam benedictionem. Prouenit ex vestre deuotionis affectu, quo nos et Romanam ecclesiam reueremur, ut peticiones vestras, illas presertim, que animarum vestrarum salutem respiciunt, ad exauditionis graciam admittamus. Hinc est, quod nos uestris supplicacionibus inclinati, ut Confessor, quem quilibet vestrum duxerit eligendum, omnium peccatorum vestrorum‚ de quibus corde contriti et ore eonfessi fuerint, semel tantum in mortis articulo plenam remissionem vobis in sinceritate fidei et vnitate sancte Romane ecclesie ac obediencia et deuocione nostra uel successorum nostrorum Romanorum pontificum canonice intrantium persistentibus auctoritate apostolica concedere valeat, deuotioni vestre tenore Presentium indulgemus; sic tamen, quod idem confessor de hiis, de quibus fuerit alicui satisfactio impendenda, eam vobis per vos, si supervixeritis, vel per alios, si tunc forte transieritis, faciendam iniungat, quam vos vel illi facere teneamini, ut prefertur. Et ne‚ quod absit, propter huiusmodi graciam reddamini procliuiores ad illicita imposterum comittenda, volumus, quod si ex confidentia remissionis huiusmodi aliquid forte commiteretis, quo ad illa predicta remissio vobis nullatenus suffragetur. Nulli ergo omnino hominum liceat hanc paginam nostre concessionis et voluntatis infringere, uel ei ausu temerario contraire. Si quis autem hoc attemptare presumpserit, indignacionem omnipotentis dei et beatorum Petri et Pauli apostolorum eius se nouerit incursurum. Datum Tibure viii. kalendas Augusti, Pontificatus nostri anno sexto. — In quorum omnium fidem et testimonium presentes litteras fieri, nostrique vicariatus officii sigilli appensione iussimus communiri. Datum Neapoli in hospicio habitationis nostre die decima octava mensis Aprilis anno domini Millesimo Trecentesimo Octuagesimo quarto, Indictione septima, Pontificatus Sanctissimi in christo patris et domini nostri, domini Urbani, diuina prouidentia Papæ sexti predicti anno septimo.

Source Fulltext: WEIS, Heiligenkreuz (=FRA II/16, 1859) S. 357-358