Jch Peter der Winckler ze Phafstetten, Wentel mein housurow vnd vnser paider erben vergehen vnd tun chunt allen den, di disen prief lesent oder hörent lesen, die nu lebent vnd hernach künftig sind, daz wir mit woluerdachtem muet vnd nach vnser nachsten vrewnt rat zu der zeit, do wir ez wol getun mochten, recht vnd redlich verchaufft haben vnsern weingarten, der do haizzet die Cholerinn vnd ist gelegen zwischen Paden vnd Phafsteten in den langen setzen zwischen Phafsteter weg vnd den obern wienner weg ze nast der geistlichen herren ze dem Heiligenchräwtz weingarten, der do haizzet die Hertzoginn an dem nidern tail vnd ze nast Christans des Mottler weingarten, der do haizzet die Cholerinn an dem obern tail, vnd do man auch von dem vorgenanten vnserm weingarten alle iar dient gen Paden in sand Stephans zech fümfzehen wienner phenning an sand Michels tag vnd nicht mer; Den obgenanten weingarten mit allen den nutzen vnd rechten, als wir den in purchrechts gewer her pracht haben, haben wir verschaufft den erbern geistlichen herren Abt Cholmann vnd dem Conuent gemain ze dem Heiligenchräwtz vnd allen irn nachkomen zu irn Spital, daz gelegen ist pei irn obgenanten Chloster ze dem Heiligenchrawtz, vmb sechtzehen phunt wienner phenninge, der wir gantz vnd gar verricht vnd gewert sein. Vnd die selben sechtzehen phunt wienner phenning hat Hainreich der Ledrer von sand Jörgen durch got vnd durch seiner sel hail willen geben zu dem vorgenanten Spital, vnd ist auch sein gütlich will vnd gunst, daz man den obgenanten weingarten zu dem selben Spital darumb gechaufft hat. Ez sullen auch die egenanten geistlichen herren vnd alle ir nachkomen den obgenanten weingarten fürbas ledichlich vnd vrevlich haben vnd allen irn frumen domit schaffen, versetzen, verchauffen vnd geben, wem si wellen an allen irrsal, wie ez irm Spital aller pest chom vnd fueglich sei. Wir sein auch, ich vorgenanter Peter, Wentel mein housurow vnd vnser paider erben des obgenanten weingarten der vorgenanten geistlichen herren vnd aller ir nachkomen recht gewer vnd scherm für alle ansprach‚ als purchrechts recht ist in dem Lannd ze Österreich. Wer awer, daz im fürbas an demselben weingarten icht abgieng mit recht, oder ob sie icht chrieg oder ansprach darumb gewunnen, von wem daz wer, waz si des schaden nement hintz Christen oder hintz Juden, den sullen wir in gantz vnd gar widerchern vnd abtragen an alle wider red, vnd sullen sie daz haben auf vns vnd allem vnserm gut, daz wir haben in dem land ze Österreich, wir sein lebentig oder tod. Vnd wann ich vorgenanter Peter vnd Wentel mein housurow nicht aygner insigel haben, darumb ze einem waren vrchund vnd ze einer bestetigung des obgenanten chouffs vnd der wandlung geben wir den vorgenanten geistlichen herren vnd allen irn nachkomen den brief versigelt mit des erwirdigen herren insigel‚ herrn Eberharts des Gundrestorfer die zeit pharrer ze Paden‚ der des egenanten weingarten von sand Stephans zech wegen ze Paden rechter gruntherr ist, vnd mit des vesten Ritter insigel, hern Christans des Techenstainer, die wir des vleizichleich gepeten haben, daz si der sach vnd der wandlung gezewg sint mit irn anhangunden insigeln, in an schaden. Geben nach Christi gepurd drewzehen hundert iar, darnach in dem vier vnd achtzigistem iar, des nasten Suntages vor dem auffartag.

Source Fulltext: WEIS, Heiligenkreuz (=FRA II/16, 1859) S. 362-364