Wir Pruder Jacob Abt ze Gotztal vnd der Conuent gemain daselbs bekennen offenlich mit dem brief vnd Tun Chünd allen, di in sehent oder hörnt lesen, di nü lebent oder her nach chunftig sind, Daz wir iærleich dienen schullen zu freyem Pürchrecht den Erbern geistleichen Herren, Abpt Cholman vnd dem Conuent datz dem heiligen Chrewtz acht phunt phenning wienner münzz vnd nicht mer von der güter wegen gelegen pey der Ybs vnd gehaizzen datz dem Haws vnd von dem Hof zway phunt phenning, vnd dann von den gütern ze Sarling, des ersten von der widem zway phunt phenning vnd von der Herschaft der Cappelln daselbs mit aller zugehorung dien wir zway phunt phenning, auzgenömen zehen schiling phenning, di da gewidemt sind zu einer wochen mezz, der sew vns nicht verchaufft habent. Dy obgenanten acht phünt phenning schull wir in dienen auf zwen täg, vier phunt auf sand Jorigen tag vnd vier phunt auf sand Michels Tag. Tet wir dez nicht vnd raichen den obgenanten dienst zü yden tag nicht, So habent sew vollen gewalt, vns vmb den versezzen dienst auf den obgeschriben gütern ze phenden vnd ze nötten als lang, hvntz si dez versezzen dienst werdent von vns gantz vnd gar gericht vnd gewert mit vnserm gutleichem willen. Ez ist auch ze merchen, daz wir mügen vnd gewalt haben, wann vns dez göt beraitt, di selben acht phunt aigens Purchrechts gultes anderswo mit ainem wechsel von in abzelesen, vnd gen in aus ze czraichen mit andern aigen grünten vnd Purchrecht, daz als güt sey vnd auch gelegen vndershalb der Tvnaw vnd damit sind die vorgenanten güter allew von in ledig vnd löz. Ez sint auch die egenanten güter von in vberhaben aller stewr vnd vngewonleicher gab, die weil si iærleich nemment von vns den obgeschriben dienst. Vnd daz dew handlung vnd di red fürbaz also stæt vnd vnzebrochen beleib, geben wir in den brief zu einem waren vrchund vnd zewgnüzz versigelten mit vnserm vnd vnsers Conuents paiden anhangunden Insigeln, Der do geben ist nach Christi gepurd Dreutzehen Hundert Iar vnd darnach in dem fümff vnd achtzigisten Iar, dez nagsten Sunntags nach Sand Veyts Tag des heiligen martrer.

Source Fulltext: WEIS, Heiligenkreuz (=FRA II/16, 1859) S. 369-370