Ich Nyclas der Fleischakcher datz Alecht vnd ich Elzpet sein hawsfraw vnd ich Nyclas der Man vnd ich Nyclas der Haslawer veriehen offenleich an dem prief vnd tun chund allen den, die nun lebent oder hernach chvnftig sind, vmb den prief, der in vnser erbirdigen Geistleichen herrn gewalt ist gewesen von dem Heyligen Chreutz vnd in ir gewalt ist chomen von des erbern heren wegen, hern Hansen seligen, der pharr datz Alecht ist gewesen, vnd der da sagt vber ain weingarten gelegen datz Phaffsteten am tewffen weg, der der vorgenanten Elzpeten, des vorgenanten Nycleins des Fleischakcher hawsfrown Margengab ist von irs vadern wiertz wegen Nycleins, dem got gnad, der des egenanten erbern heren hern Hansen seligen veter ist gewesen, daz si vns den prief gewen habent zu vnsern hanten also mit der peschayden, ob daz wer, daz ymant hernach chem vnd wolt erb sein des egenanten weingarten vnd die vorgenanten herren davon tzuspruch gewunnen, da schull wir vmb ir fuerstand sein vnd schullen daz verantwurten vnd ausrichten an all ir scheden, Tet wir dez nicht, vnd was si des schaden nemment, wie der schad genant ist, nichts ausgenomen, denselben schaden allen schullen wir in abtragen vnd widercheren an alle widerred, vnd daz schullen si haben auf vns vnuerschaydenleich vnd auf all vnsrer hab, die wir haben in dem lant zu Osterreich, oder wo wir die haben, wir sein lembtig oder tod, Vnd daz in daz alzo stet vnd vntzebrochen peleib, darvber geben wir in den prief versigelt mit des erbern vesten Ritter insigel, hern Jorgen des Alachter vnd mit des erbern chnechts insigel, Erhartz datz Alecht. Wann wir aygen insigel nicht haben, nu hab wir dew fleizzig peten, daz si der sach tzeug sind mit yren anhangunden insigeln, in an schaden, darvnder wir vns verpinden, alles das stet zu haben, daz var an dem prief geschriben stet. Geben nach Christi gepurd drewtzehen hvndert iar, dar nach in dem acht vnd achtzkisten Iar, an sand Peters vnd sand Pawls tag der heyligen zwelif poten.

Source Fulltext: WEIS, Heiligenkreuz (=FRA II/16, 1859) S. 375-376