Georius dei et Apostolice sedis gracia Episcopus Pattauiensis Vniuersis et singulis presentes litteras inspecturis et quos infrascriptum tangit negotium seu tangere poterit quoslibet in futurum Salutem in domino. Litteras sanctissimi in Christo patris et domini nostri, domini Vrbani, diuina prouidentia pape VI^ti, in filo canapis more romane curie Bullatas non abolitas, non viciatas, neque in aliqua sui parte suspectas, sed omni vicio prorsus et suspicione carentes nobis per venerabilem in christo dilectum Cholomannum Abbatem Monasterii Sancte Crucis in austria ordinis Cisterciensis nostre patauiensis diocesis presentatas cum ea, qua decuit, reuerentia nos recepisse noueritis per omnia in hec uerba. (Folgt die sub Nr. CCCXVIII abgedruckte Bulle Papst Urban's VI.‚ ddo. Genua 25. Mai 1386.) Post quarum litterarum apostolicarum presentacionem et receptionem fuimus pro parte eiusdem Abbatis cum debita instancia requisiti, vt ad executionem dicti mandati apostolici procederemus iuxta traditam nobis formam. Nos igitur volentes ad executionem ipsius procedere, vt tenemur, visis diligenter et inspectis supradictis litteris bone memorie Gwidonis, episcopi Portuensis, tunc tituli sancte cecilie presbyteri Cardinalis, ac felicis recordacionis domini Alberti olim episcopi patauiensis, predecessoris nostri sigillis eorum pendentibus sigillatis et receptis desuper securius informacionibus per testes ydoneos et iuratos, quibus nobis securie constitit et constat, quod huiusmodi littere ac sigilla fuerint eorumdem‚ scilicet Cardinalis et episcopi, quorum in eisdem litteris describuntur, fuisse et esse, quodque predicta sigilla fuerunt et esse consueuerunt autentica‚ quibus est non in merito fides adhibenda et quod iuxta consuetudinem huius patrie priuilegia episcopi patauiensis pro tempore existentis non consueuerunt per notarios publicos subscribi uel signari. Quapropter vnionem, annexionem et incorporacionem per prefatos dominos Gwidonem cardinalem et Albertum episcopum patauiensem de predicta parochiali ecclesia Sancti Georgii in Alech, nostre diocesis predicto Monasterio Sancte Crucis in austria sentenciam, seu modum et formam in predictis litteris expressam auctoritate apostolica, qua fungimur, in hac parte non obstante, quod littere dicti domini Alberti, predecessoris nostri per tabellionem subscripte et signate non fuerunt, ex certa sciencia approbamus et confirmamus in hiis scriptis, nobis nichillominus eadem auctoritate reseruate assignando potestatem, de fructibus, redditibus et prouentibus ipsius parochialis ecclesie in Alech, si prius assignata non fuerit, congruam porcionem, de qua congrue sustentari, episcopalia iura soluere valuat et alia sibi incumbencia onera supportare pro perpetuo vicario in ea domino seruituro, In quorum omnium fidem et testimonium presentes litteras sigilli nostri munimine unacum subscriptione Johannis Synndrami, notarii publici infra scripti subscribi et muniri fecimus ac etiam publicari. Acta sunt hec Wyenne in curia nostra episcopali anno domini Millesimo trecentesimo octuagesimo nono, indictione duodecima, die penultima mensis Octobris, hora vesperorum uel quasi Presentibus venerabilibus viris et dominis, Conrado comite de Hohenberg, canonico ecclesie Herbipolensis, Joanne Rewter licenciato in decretis, Ottone de Layming et Johanne de Mauerkirchen, ecclesie patauiensis canonicis et pluribus aliis fide dignis testibus ad premissa vocatis et specialiter rogatis. Et ego Johannes Synnrami de Heylgenstad, clericus Maguntine diocesis publicus Imperiali auctoritate notarius, quia dictarum litterarum apostolicarum presentacioni, receptioni, requisicioni, approbacioni et confirmacioni ac omnibus et singulis supradictis, dum sic per Reuerendum patrem dominum Georium episcopum Patauiensem predictum et coram eo agerentur et fierent, una cum prenotatis testibus presens interfui, eaque sic fieri vidi et audiui ac presentes litteras per alium, me aliis occupato negociis fideliter scriptas de mandato domini episcopi antedicti, publicaui et in hanc publicam formam redegi, meque subscripsi signo et nomine meis solitis et consuetis, vna cum appensione sigilli eiusdem domini Episcopi consignando in euidens testimonium omnium premissorum.

Source Fulltext: WEIS, Heiligenkreuz (=FRA II/16, 1859) S. 376-377