Ich Prueder Niclas von der Littaw, zu den zeiten maister des Hawses datz dem Heiligengeist vor kernertor zu Wienn vnd ich prueder daniel, seiner Swester Svn, die zeit Prior vnd Schaffer desselben Hawses datz dem heiligengeist, Wir vergehen offenleich mit dem brief vmb den Hof vnd gueter gelegen zu Simoning, die fraw Kathrey mein egenanten prueder Niclas Swester gechaufft hat Ir vnde vns, die purchrecht sind von den erbern Geistleichen Herren . . . Dem Abt vnd dem Conuent von dem heiligen chrawtz nach des chawfbriefs sag, der vns daruber gegeben ist, Das wir vns des gegen denselben Geistleichen herren verlüpt vnd verpunden haben also, ist, das es zu schulden chumpt, das wir den vorgenanten Hof vnd gueter ynnhaben vnd besitzen werden, daz wir denn dauon alles das leyden vnd dulden sullen, alz behaustes purkchrechts recht ist zu gleicher weyse, als ob wir Layen weren an geuär. Vnd des zu vrchund geben wir In den brief versigilten mit mein obgenanten prueder Niclas Insigil maister zu dem Heiligengeist vnd mit des Conuents Insigil daselbens, der daz durich vnser pet willen ze getzeugnusse der sach an den brief gehangen hat, Im an schaden. Der brief ist geben zu Wienn nach kristi geburd drewtzehenhundert Iare darnach in dem newn vnd newntzgistem Iare, des nechsten phuntztags vor sand Vlreichs tag.

Source Fulltext: WEIS, Heiligenkreuz (=FRA II/16, 1859) S. 398