Ich, Albr(echt) der Ortenstainêr, hofrichter in O^esterreich, vergich, das fu^er mich cham, do ich sas an dem rechten in dem hoftaiding ze Wienn, pru^eder Vlreich, chellnêr zu dem Heyligenchraw^etz, und chlagt mit vorsprechen an seins herren des abpts und des gantzen convents stat daselbs hintz hern Pernharden von Liechtenstain, darumb das er in an i^err mu^el pey Rasenaw ein sag hab lazzen zehakchen und od gelegt und hab das getan mit gewalt, des si umb zwai hundert phunt phenning enkolten haben, und chlagt das als lang hintz im, untz das er pitzaig tet desselben gewalts an di stat, do der gewalt geschechen ist. Darnach in dem nasten hoftaiding cham der vorgenant pru^eder Vlreich vom Heyligenchrawtz aber fu^er recht und pat vragen nach der pytzaig, di er im getan hiet, was recht wêr. Do ward ertailt, man solt in vadern, und nach der vadrung ertailten di lanntherren und geviel do mit vrag und mit u^ertail, seid weder her Pernhart von Liechtenstain noch ander yemant von seinen wegen vor recht wêr, der in nach der pitzaig verantwurtt hiet, und auch der schreiber nach des fronpu^echs sag sein chuntschafft darumb gesagt hiet, so sull auch man den vorgenanten pru^eder Vlreichen den chellnêr an seins herren des abpts und des convents stat zu dem Heiligenchrawtz aller seiner hab, erbguet und varundgu^et, wie di genant ist oder wo die gelegen ist, wo si darauf chomen und getzaigen mu^egen, als vil und als genu^eg inantwu^ertten, gewaltig machen und an di gewer setzen, inne ze haben, niessen und nu^eczen und allen i^ern frumen damit schaffen, als verre und als lang, untz das sew der vorgenanten zwair hundert phunt phenning irr schaden gantz und gar davon verricht und gewart werden. Und sullen auch sew, mein herren di hertzogen oder wer an i^err stat i^ern gewalt hat im lannde ze Osterreich, darauf schierm und freyn vor allem gewalt und unrecht.||
Mit urkund des priefs, versigelt mit meinem anhangundem insigel.||
Geben ze Wienn nach christi gepu^erd in dem viertzehenden hundertistem jar des mitichens nach dem Prehen tag.