Ich Trawtman der Hu^epler, purger ze Medlikch, und ich Kathrey, sein hausfraw, und all unser erben, wir vergehen und tu^en chunt allen den, die den brief lesend oder ho^ernt lesen, die nu lebend und hernach chu^emftig sind, das wir mit guetem willen, mit wolbedachtem mu^et und mit gesambter hannt, zu der zeit, do wir es wol getu^en mochten, verchawft haben ayn phunt Wienner phening geltes ewiges gruntrechts, das rechtes aigen ist, das uns die hernach benanten le^awt je^arleich gediennt habent in unser haws gelegen daselbens ze Medlikch:||
Hainreich der Werder von einem weingarten zwischen den wassern zwen phening, Janns Pawr von Mynnkchendorff sechs phening, Ott Hurnaws von einem weingarten sechs phening, o^ertlinn Ungelte^arinn drey phening, Mertt Prayter, Dietel Hengst, Thoman Laynêr und Hanns in der Chotgassen ygleicher zwen phenyng, ich egenanter Trawtman Hu^epler von einem weingarten drey phening, Hanns Pu^esenkoph drey phening, Peter Fre^ewdinger drey helbling, Wenczel Sneyder einen helbling, Hanns Werder vier phening, der Spitaler von dem Heiligenkre^awcz von einem weingarten vier phening, Janns Hawbtman von einem weingarten acht phening, Hanns in dem Pawmgarten von ayner secz zwelif phening, Fridel under dem e^anyger von einem weingarten, haisset die Swu^epel, siben phening, Fridel Zechmaister vierczehen phening, Niclas Pu^erkchel von einem weingarten in den Wysseczen newn und sechczig phening, Schawl der jud von einem weingarten auf dem Staynveld achthalben phening, die Lynndnêrinn achthalben phening, Gilig Malczer und Chu^enrat Holczer von einem weingarten, haizzet die Re^aschinn, vierczehenthalben phening, Margret Ernsts des Frueten witib sechs phening, Fridel u^ender dem e^anyger, Vlreich Zweyrer, Vlreich Mawrer und Stephan Raysnêr von einem weingarten, genant der Schiltmaler, vierczehen phening, Vlreich He^akkinger, Tibolt und Vlreich Beraiter ygleicher vierhalben phening, Kathrey Fu^echslinn und Margret Niclas des Gileis witib ygleichew vier phening, Stephan Fleischhakcher von einem weingarten im Sechstal sechczehen phening, Hanns der Vnger und Michel im Grashof yegleicher von einem chrawtgartten drey phening.||
Das vorgenant phunt geltes ewiges gruntrechts haben wi^er recht und redleich verkawft und geben mit allen den nu^eczen, eren und rechten, mit stifften und mit sto^ern, als wi^er es unversprochenleich in aigens gewer herbracht haben und als es mit alter hercho^emen ist, umb ayndlef phunt Wienner phening, der wi^er gancz und gar verrichtt und gewert sein, dem erwu^erdigen geistleichen herren prueder Niclasen, zu den zeiten abbt des gotshawses dacz dem Heiligenkre^awcz, und dem convent gemayn daselbens und i^ern nachkomen, fu^erbaz ledichleich und freyleich ze haben und allen i^ern frumen damit ze schaffen, verchawffen, verseczen und geben, wem sy wellen, an allen i^errsal, und sein auch wi^er, ich egenanter Trawtman der Hu^epler und ich Kathrey sein hausfraw und all unser erben, unverschaidenleich des vorgenanten phunt geltes ewiges gruntrechts mit stifften und mit sto^ern, als vorgeschriben stet, der egenanten geistleichen herren dacz dem Heiligenkre^awcz und i^erer nachkomen recht gewern und scherm fu^er alle ansprach, als aigens recht ist und des lanndes recht ze O^esterreich. We^ar aber, das in fu^erbaz an derselben gu^elt icht abgieng mit recht oder ob in icht chri^eges oder ansprach daran auferstu^end, von wem das we^ar, mit recht, daz su^ellen wi^er in alles ausrichten und widerchern an allen i^ern schaden, und su^ellen sy das haben auf uns unverschaidenleich und auf allem unsern gu^et, das wir haben in dem lande ze O^esterreich oder wo wi^er es haben, wi^er sein lebentig oder tod.||
Und das der chawf fu^erbaz also ste^et und unczebrochen beleib und wand wir selber aigen insigil nicht haben, darumb so geben wi^er in den brief zu einem warn urchund der sach, versigilten mit der zwayr erbern mannen insigiln Hannsen von Woldestorff und Stephanns des Re^awttêr, baid purger ze Medlikch, die wi^er des vleizzichleich gepeten haben, daz sy der sach geczeugen sind mit i^ern insigiln, in an schaden, und verpinden auch uns mit unsern trewn angeve^ar u^ender i^ern insigiln, alles daz ste^at zu haben, das vor an dem brief geschriben stet, der geben ist nach Kristi gepurt in dem vierczehenhundertistem jare, des nagsten Erichtags vor sand Marie Magdalen tag.