Ich Vlr(eich) Wymar von Amestal und ich Christan sein prueder, wir veriehen offenleich mit dem brieff, das wi^er a^ein ha^elbs lehen gechaufft haben von dem geistleichen herren hern Niclasen, Vlreichs des Zehentner sun, mit aller zu^egehorung, das uns gelihen hat der erber dy zeit aygenmaister ze Nidernsulcz, an meins gnedigen herren stat zu^e dem Heiligen Chreutz, in der beschaidenhayt, das wi^er das vorgenant halb lehen stifftleich schollen legen in drein jaren und darauff pawn vier gemaech, a^ein stuben, ain furhaws, ain gadem und ain stal an gever. Wer awer, das wi^er das inder drein jaren nicht ta^eten, als var geschriben stet, so schullen meinn vorgenant herren oder i^er aygenmaister sich zu dem vorgenanten gu^et ziehen und selben stifftleich legen an all unser widerred, und schullen auch wi^er vervallen sein unserm rechten herren funff phunt phennig ze wandel, und geben yn den brieff zue ainer waren u^erchund der sach, versigelt mit der erbern Hanseins des Achenstawer und Wilhalms des Taffler anhangunden insigel, yn payden und auch i^er paeder erben an schaden, wenn wi^er sew des fleissechleich gepeten haben, wenn wir aygens insigel nicht haben.||
Der brieff ist geben nach Christi gepurd vi^ertzehenhundert jar, darnach¹ in dem ersten jar, des freitag nach sand Cholmans tag.