Ich Mert, ich Niklas, ich Hanns, ich Michel und ich Stephan, gepru^eder die Inczesdorffer ze Otakcherynn, wir vergehen und tun kund allen den, die den brief lesent oder ho^erent lesen, die nu lebent und hernach ku^enftig sind, das wir mit gu^etem willen, mit wolbedachtem mu^et, zu^e der zeit, do wir es wol getu^en mochten, und mit des erbern mannes hannt Vlreichs des Hekchel ze Praytensee, zu^e den zeiten pergmaister der erbern geistleichen herrn dacz dem Heylikenkre^autz, verchauft haben unsers rechten ve^aterlichen erbgu^ets unseren weingarten gelegen ob Praytense an der Smelcz in dem Mitternperg, dez eyn halbs jewch ist, ze ne^achst Chunrats weingarten dez Rampperstorffer, do mon von dem egenanten unserm weingarten alle jar di^ent den geistleichen herren dacz dem Heyligenchre^aucz sechczig Wienner phening fu^er perkrecht und fu^er zehent und drey Wienner phening ze voytrecht und nicht mer. Denselben weingarten haben wir recht und redleich verchauft und geben mit allen den nu^eczen und rechten, als wir in unversprochenleich in perkrechts gewer herpracht haben und als er mit alter hercho^emen ist, umb sechsthalbs und vierczig phunt Wienner phening und umb aynen guldein, des wir alles gancz und gar verrichtet und gewert sein, dem erbern mann Heinreichen von Ybs dem sneyder, purger ze Wienn, und seinen erben oder wem er denselben weingarten, den er umb seyn ledigs varund gu^et gechauft hat, schafft, macht oder geyt, fu^erbas ledigkleich und freyleich ze haben und allen irn frumen damit ze schaffen, verchauffen, verseczen und geben, wem si wellen, an allen irrsal. Wir sein auch mitsamt allen unsern erben unverschaydenleich des vorgenanten weingartens des egenanten Hainreichs von Ybs und seiner erben oder wem er in schaft, macht oder geyt, recht gewer und scherm fu^er alle ansprach, als perkrechts recht ist und dez lanndes recht ze O^esterreich. We^ar aber, das in fu^erbas an demselben weingarten icht kriegs oder ansprach auferstu^end, von wem das we^ar mit recht, swas sy des schaden nement, das su^ellen wir in alles ausrichten und widerchern an allen irn schaden, und su^ellen auch si das haben auf uns unverschaydenleich und auf allem unserem gu^et, das wir haben in dem lannde ze O^esterreich oder wo wir es haben, wir sein lebentig oder tod.||
Und das der chauff fu^erbas also stet und unczebrochen beleyb, und wannd wir selber aygner insigilen nicht haben, daru^eber so geben wir in den brief zu^e eynem warn urchund der sach, versigilten mit dez obristen perkcherrn insigil des erbern geistleichen herrn, pru^eder Albrechts zu^e den zeyten abbt dacz dem Heyligenkre^awcz, und mit des erbern mannes insigil Hannsen dez Strasser, purger ze Wienn, die wir dez vleizzigleich gepeten haben, das si der sach geczeugen sind mit iren angehangen insigiln, demselben Strasser an schaden, und verpinden uns auch mit unseren treun angeverd under irn insigilen, alles daz stet ze haben und ze laisten, daz vor an dem brief geschriben stet, der geben ist ze Wienn nach Kristi gepu^erd vierczehenhundert jar, darnach in dem vierden jar, des nachsten samcztags nach sand Johanns tag ze sunnbenden.