Ich Peter der Fro^eleich der pinter, purger ze Wienn, vergich fu^er mich und fu^er all mein erben und tuen kund allen den, die den brief lesent oder ho^erent lesen, die nu lebent und hernach ku^enftig sind, daz ich mit gutem willen und mit wolbedachtem mu^et zu der zeit, do ich es wol getuen mocht, verchaufft han meinen hof, den mir fraw Dorothe, weylent mein hausfraw, der Got genad, ledikchleich geschafft hat, als ich dasselb gesche^afft vor dem rat der stat ze Wienn mit erberr chuntschafft beweyst han ze rechter zeit, als ich ze recht sol und als es ze einer ewigen gedachtnu^ezz in dem statpuech geschriben stet, und leit auch der vorgenant hof ze Phafsteten ze negst Stephann dem V^ebelakcher, des die erbern geistleichen herren von dem Heiligen Kre^awcz recht gruntherren sind, mit stiften und mit sto^ern und alles daz, daz zu dem vorgenanten meinem hof geho^eret, wie daz genant ist, dovon man alle jar dient denselben geistleichen herren dacz dem Heiligen Kre^awcz fu^enf schilling Wienner phening an sand Michels tag und drey schilling und ainen phening an sand Jorigen tag ze gruntrecht und nicht mer. Den vorgenanten meinen hof und swaz darczu geho^eret han ich recht und redleich verchaufft und geben mit allen den nu^eczen und rechten, als ich in unversprochenleich in gruntrechts gewer herpracht han und als er mit alter herkomen ist, umb sechczig phu^ent Wienner phening, der ich gancz und gar verrichtet und gewert pin, dem erwirdigen geistleichen herren abpt Albrechten dacz dem Heiligen Kre^awcz und dem convent gemain daselbens und iren nachkomen fu^erbas ledikchleich und freyleich ze haben und allen iren fru^emen damit ze schaffen, verchauffen, verseczen und geben, wem si wellen an allen irrsal. Und sein auch ich egenanter Peter der Froleich und all mein erben unverschaidenleich des vorgenanten hofs und alles des, daz darczu geho^eret, der egenanten geistleichen herren dacz dem Heiligen Kre^awcz und irer nachkomen recht gewern und scherm fu^er alle ansprach, als gruntrechts recht ist und des lanndes recht ze Osterreich. Wer aber, daz in an demselben hof und seiner zugeho^erung icht krieges oder ansprach auferstu^end, von wem daz we^ar, mit recht, das sullen wir in alles ausrichten und widerkern an allen iren schaden, und sullen si daz haben auf uns unverschaidenleich und auf allen unserm guet, daz wir haben in dem lannde ze Osterreich oder wo wir es haben, wir sein lebentig oder tod.||
Und daz der kauf fu^erbaz also ste^at und unczerbrochen beleib, und wannd ich obgenanter Peter der Fro^eleich selber aygen insigel nicht hab noch die vorgenanten geistleichen herren dacz dem Heiligen Kre^awcz in selber in den vorgeschriben sachen nicht beste^aten mu^egen, darumb so gib ich fur mich und fur all mein erben in und iren nachkomen den brief ze einem waren urchu^end, versigelten mit der zwayer erbern mannen insigeln hern Paulen des Geyr, dieczeit des innern rates der stat ze Wienn, und hern Pawlen des Wurfel, dieczeit des aussern rates daselbens, die ich des fleizz(igleich) gepeten han, daz si der sach gezeugen sind mit iren insigeln, in an schaden. Darunder ich mich verpind mit meinen trewn angever, alles¹ daz ste^at ze haben, daz vor an dem brief geschriben stet, der geben ist ze Wienn nach Kristi gepu^erd vierczehenhundert jar, darnach in dem virden jar des negsten eritags vor gotesleichnam tag.