Reverendis in Christo patribus ac dominis dominis abbatibus sacri ordinis cisterciensis Saltzburgensis diocesis frater Georgius abbas monasterii sanctae Crucis in Austria ejusdem ordinis Pataviensis diocesis ac collegii praefati nostri ordinis Wiennae visitator natalis salutem et in domino Jesu sinceram caritatem. Patres venerandi, vobis non abs moestitia cordis dolentesque deferimus istis jam erumpnosis temporibus collegium nostrum Wiennae usque hodie orbatum studentibus et cum nos ipsi saepe saepiusque requisiti fuerimus per provisorem adhuc inibi degentem et utcunque praedictum locum sustentantem, quatenus nobis commissis satisfaceremus statutis et diffinitionibus exhortando, persuadendo et ad extremum compellendo, vos patres et dominos abbates ad dirigendum scolares, ne praefatum collegium deveniret, ut formidinis non modicum est, ad manus saeculares. Verum anno dudum elapso propria nos urgente conscientia atque provisore nostro a generali capitulo ibidem instituto specialiter iustigante, vobis venerabilibus patribus et cuilibet vestrum notificavimus, jam dictum collegium scolaribus fore destitutum, supplicando imo et auctoritate ordinis praecipiendo quatenus scolares vestros ad praetactum Wiennense Studium destinaretis. Sed quantum zelum ad observantiam ordinis nostri statutorum senserimus, tempore suo lucidius enodare curabimus. Ne vero nobis quaevis de talis modi ordinis commissionis ascribatur negligentia et vestrae paternitates scuto ignorantiae se defensent, nunc iteratis vicibus vestris reverendis paternitatibus instantissime supplicamus, ne domus pro studio ordini collata et incorporata et ad nostra tempora sic continuata diutius maneat vacua et ordinis statuta, prout obligamur ad ea seeundum sanctiones patrum antiquorum transgrediantur, et vestris non parumper aggraventur in conscientiis, quatenus quilibet vestrum ad proximum beati Ambrosii festum suum scolarem dirigere non obmittat suis cum necessariis ad collegium saepedictum, in quo haud dubium ordini nostro et universitati Wiennensi faciet complacentiam et conscientiarum vestrarum procurabit serenationem. Si vero quis vestrum, quod absit, parvipendens nobis ymo vero ordini obtemperare renuerit, compellemur hoc ipsum ad futurum generale capitulum deferre, pariter et ejusdem nostri collegii provisionem ulteriorem eidem committere. Postremum praesentium exhibitorem, harum videlicet literarum bajulum omnibus et singulis Christi fidelibus et praesertim dominis patribus et personis ordinis sinceriter in domino recommendamus, quatenus eidem in viae vitaeque necessariis a sallario congruenti, prout ratio secundum locorum distantiam dictaverit, providere curetis, certificantes nos per eundem de ipsius diligentia et vestra bona voluntate. Datum in nostro monasterio sanctae Crucis dominica laetare, anno domini millesimo, quadringentesimo sexagesimo tertio sub appensione sigilli nostri||
abbatialis.

Source Fulltext: Zisterzienser-Chronik 11 (1899) S. 307-308