Nos frater Hymbertus, abbas Cistercii, ceterique diffinitores capituli generalis cisterciensis ordinis notum facimus universis, quod in eodem generali capitulo die XIII. mensis septembris anno domini millesimo quadringentesimo septuagesimo tertio apud Cistercium celebrato facta fuit quaedam diffinitio, cujus tenor sequitur, et est talis. Paratas gerens manus capitulum generale ad subveniendum necessitatibus et agendis quibuslibet in ordine ernergentibus et accidere valentibus nec non ad succurrendum officiis et auctoritatibus quorundam patrum abbatum in sibi subditis monasteriis et filiabus tam mediatis quam immediatis confidens ad plenum de sufficientia et ydoneitate abbatis de Runa, qui nunc est aut pro tempore fuerit, per septennium immediate secuturum committit plenariam auctoritatem et potestatem praesidendi in nova provisione, dum acciderit fienda sive per spontaneam resignationem sive per obitum aut alias juxta formam institutionum sanctorum patrum nostrae religionis providendi, si et dum casus acciderit de novo abbate et pastore sufficienti et ydoneo in monasterio de sancta cruce in Austria, supplendo vices abbatis morimundi patris abbatis ejusdem monasterii de sancta cruce, qui tum propter nimiam locorum distantiam tum propter varia guerrarum discrimina tum etiam propter certa impedimenta in eodem morimundi monasterio orta de hujusmodi commissione ad ipsum et dictum monasterium juridice pertinente, pro hac vice providere non potest, agendique, instituendi et destituendi, confirmandi et infirmandi, ceteraque faciendi in eodem monasterio de sancta cruce, quae agere et facere posset, deberet ipse pater abbas, absque nihilominus praejudicio paternitatis et auctoritatis paternalis ejusdem patris abbatis in dicto monasterio de sancta cruce et per omnia in praemissis agendi in plenaria ordinis potestate. Datum sub sigillo diffinitorum ejusdem capituli, anno, mense, die et loco supradictis.

Source Fulltext: Zisterzienser-Chronik 11 (1899) S. 342-343