Nos frater Hymbertus, abbas Cistercii, ceterique diffinitores capituli generalis cisterciensis ordinis notum facimus universis, quod in eodem generali capitulo, die XII^mo mensis septembris anno domini millesimo quadringentesimo septuagesimo quarto apud Cistercium celebrato facta fuit quaedam diffinitio, cujus tenor sequitur et est talis. Cum propter viarum multiplicia discrimina locorumque distantiam maximam non possit ordo ad praesens mittere suos receptores deputatos ad colligendum contributiones debitas in monasteriis bavariae, austriae et styriae annuatim ut consuevit, generale capitulum abbati sanctae crucis in austria, de cujus fidelitate ac diligentia confidit, tenore praesentium committit ac praecipit, ut easdem contributiones ordinis ab omnibus et singulis monasteriis ordinis dictorum ducatuum bavariae, austriae et styriae diligenter exigat et fideliter colligat annuatim, rebelles et eas solvere renventes per censuras in statutis et privilegiis ordinis contentis viriliter compellendo in plenaria ordinis potestate; quas tamen contributiones sic per eum collectas de triennio ad triennium ad Cistercium portare vel mittere, et de receptis fidelem computum domino Cistercii ac aliis receptoribus ordinis reddere teneatur. Datum sub sigillo diffinitorum ejusdem capituli, die, mense, anno et loco supradictis.

Source Fulltext: Zisterzienser-Chronik 12 (1900) S. 27