Frater Hymbertus abbas Cistercii, Cabilonensis diocesis, venerabilibus in Christo nobis praecarissimis abbatibus, abbatissis, prioribus, monachis, militibus, monialibus, noviciis, conversis, donatis, oblatis et commissis ac aliis nostri cisterciensis ordinis personis, familiaribus, continuis commensalibus, yconomis, procuratoribus, negotiorumque nostri ordinis et personarum gestoribus utriusque sexus ubicunque commorantibus salutem. Nobis ordinatione et instantia capituli generalis nostri cisterciensis ordinis pro arduissimis rebus et materiis dicti ordinis cum venerabilibus coabbatibus nostris fratribus Johanne sancti Bernardi Valen. generali procuratore ordinis, Arnoldo et Johanne de Veteri monte et Theoloco monasteriorum abbatibus, sacrae Theologiae professoribus, nostris in legatione praesenti collegis urbem intrantibus, inter alia, quae commoda vestra et ordinis concernunt, ad vitandum discursus et evagationes personarum utriusque sexus ejusdem ordinis, quae plurima humanae saluti afferunt incommoda, hoc primum nobis et dictis coabbatibus et collegis nostris visum exstitit, ut peccatorum vestrorum omnium plenariam remissionem et sanctissimum jubilaeum vobis obtineremus. Hinc est, quod Sanctissimus noster in Christo pater et dominus noster dominus Sixtus divina Providentia papa Quartus vobis omnibus et singulis ad supplicationem nostram gratiam (contulerit), ut confessor ydoneus ejusdem ordinis, quem vestrum quilibet duxerit eligendum, vos et quemlibet vestrum ab omnibus et singulis excommunicationis, suspensionis et interdicti aliisque ecclesiasticis sententiis, censuris et poenis a jure vel ab homine, apostolica vel alia quavis auctoritate, generaliter vel specialiter latis, inflictis et promulgatis, nec non ab omnibus et singulis peccatis, criminibus et excessibus vestris et delictis quibuscunque quantumcunque enormibus, de quibus corde contriti et ore confessi fueritis, etiam si talia fuerint, propter quae merito sedes apostolica foret consulenda, semel tantum in hoc sancetissimo jubilaei anno absolvere et poenitentiam salutarem injungere, ac etiam super irregularitate, si quam quavis occasione vel causa contraxeritis, vel quilibet vestrum contraxerit, dispensare, quodque quieunque ex vobis sacerdos, Septem missas continuatis vel interpollatis diebus, monachus vero non sacerdos et monialis Septem vicibus officium defunctorum, videlicet vesperas et nocturnos cum novem lectionibus et laudibus et totidem vicibus septem psalmos poenitentiales cum letaniis et collectis in ordine consuetis etiam continuatis vel interpollatis diebus, ceteri vero praedicti septies sexaginta vicibus orationem dominicam, videlicet Pater noster et totidem Ave Maria etiam continuatis vel interpollatis diebus dixerit vel dixerint, ac etiam septem continuatis vel interpollatis diebus quatuor altaria, per abbatem, abbatissam aut loca ejusdem praesidentem deputanda, si inibi totidem altaria fuerint, alias quatuor vicibus quolibet dictorum septem dierum altaria quae inibi fuerint, visitaverit vel visitaverint, hoc tamen attento, quod, ubi in monasteriis virorum feminae donatae et commissae domino famulantur, praefatae donatae et commissae capellam in porta monasterii consistentem, si inibi capella fuerit, alioquin capellam, quam eis loci praesidens extra tamen septa monasterii deputaverit; in monasteriis vero monialium, in quibus viri etiam domino famulantur, feminae praefatae altaria intra clausuram ipsarum monialium solum, viri vero altaria vel altare extra clausuram praefatam consistentia vel||
consistens per dictam abbatissam deputanda vel deputandum visitent, unicuique vestrum plenissimam omnium peccatorum suorum indulgentiam et sanctissimum jubilaeum vobis in sinceritate fidei et unitate sanctae romanae ecclesiae ac praefati sanctissimi domini nostri et successorum suorum Romanorum Pontificum canonice intrantium obedientia et devotione persistentibus, perinde ac si personaliter ecclesias ad hoc deputatas in alma urbe visitassetis, vel vestrum quilibet visitasset, auctoritate apostolica concedere valeat et possit. Vestrum tamen si qui fuerint infirmi vel impotentes seu senes et debiles qui visitationes et orationes hujusmodi commode adimplere nequiverint, suorum confessorum judicio stare debeant praefata auctoritate apostolica ejus vivae vocis oraculo indulsit praesentibus reverendissimo in Christo patre et domino domino Philippo, miseratione divina episcopo Portuensi, sacrosanctae romanae ecclesiae cardinali, nostri sacri ordinis Protectore benivolo, nec non praefatis venerabilibus coabbatibus nostris. Datum Romae sub appensione sigilli nostri die decima nona mensis Julii, anno a nativitate Domini millesimo quadringentesimo septuagesimo quinto; Pontificatus ejusdem Sanctissimi domini nostri anno quarto.

Source Fulltext: Zisterzienser-Chronik 12 (1900) S. 91-92